India Vs England 3rd Test Day 3 : भारताचा युवा सलामीवीर यशस्वी जैस्वालने विशाखापट्टणमवर द्विशतकी खेळी केली होती. आता पुढच्याच राजकोट कसोटीत त्याने दुसऱ्या डावात शतकी खेळी करत भारताला विजयाच्या मार्गावर अग्रेसर केलं आहे.

तिसऱ्या कसोटीच्या तिसऱ्या दिवशी मोहम्मद सिराजने इंग्लंडला 319 धावात रोखले. भारताने 126 धावांची आघाडी घेतल्यानंतर दुसऱ्या डावात 2 बाद 196 धावा केल्या. सुरूवात संथ करणाऱ्या यशस्वी जैस्वालने नंतर तुफान फटकेबाजी करत इंग्लंडचा बॅझबॉल मोडूनच खाल्ला. त्याला शुभमन गिलने नाबाद अर्धशतक ठोकत चांगली साथ दिली.

भारत आणि इंग्लंड यांच्यात राजकोटमध्ये पाच सामन्यांच्या कसोटी मालिकेतील तिसरा सामना खेळला जात आहे. मालिका सध्या 1-1 अशी बरोबरीत आहे. भारतीय कर्णधार रोहित शर्माने नाणेफेक जिंकून प्रथम फलंदाजी करण्याचा निर्णय घेतला. भारतीय संघाचा पहिला डाव 445 धावांवर संपला. इंग्लंडचा पहिला डाव 319 धावांवर आटोपला. सिराजने 4 विकेट्स घेत इंग्लंडचे कंबरडे मोडले. बेन डकेटने एकाकी किल्ला लढवत 153 धावांची दमदार खेळी केली. बेन स्टोक्सने देखील 40 धावांचे योगदान दिलं.

भारताने 126 धावांची आघाडी घेतल्यानंतर आपला दुसरा डाव सुरू केला. रोहित शर्मा आणि यशस्वी जैस्वालने 30 धावांची सलामी दिली. मात्र इंग्लंडने चांगला मारा केल्यामुळे भारताची सुरूवात संथ झाली. मात्र रोहित बाद झाल्यानंतर यशस्वीने डावाची सूत्रे आपल्या हातात घेतली.

त्याने शुभमन गिल सोबत भागीदारी रचण्यास सुरूवात केली. सुरूवातीला 73 चेंडूत 35 धावा करणाऱ्या यशस्वीने चहापानानंतर गिअर बदलला अन् आक्रमक फटकेबाजी केली. त्याने 122 चेंडूत शतक पूर्ण केले.

पाठोपाठ गिलने देखील आपले अर्धशतक पूर्ण केले. या दोघांनी दुसऱ्या विकेटसाठी 155 धावांची भागीदारी रचली. मात्र शतकानंतर यशस्वीच्या पाठीला दुखापत झाली अन् त्याने मैदान सोडले. त्यानंतर आलेला रजत पाटीदार शुन्यावर बाद झाला. अखेर कुलदीप यादव आणि शुभमन गिलने तिसऱ्या दिवसाचा खेळ संपवला.

खेळ संपला त्यावेळी भारताच्या दुसऱ्या डावात 2 बाद 196 धावा केल्या होत्या. भारताकडे दिवसअखेर 322 धावांची आघाडी आहे.

(Sports Latest News)