Yuvraj Singh Virat Kohli T20 WC 2024 : भारताचा दिग्गज माजी अष्टपैलू खेळाडू युवराज सिंगने भारताची रन मशिन विराट कोहलीचे तोंडभरून कौतुक केलं आहे. तो म्हणाला की सध्याच्या घडीचा विराट कोहली हा सर्वात चांगला फलंदाज आहे. गेल्या वर्षी आयसीसी वनडे वर्ल्डकपमध्ये विराट कोहलीने अनेक विक्रम आपल्या नावावर केले आहेत. तो स्पर्धेत सर्वाधिक धावा करणारा फलंदाज ठरला होता.

विराट कोहली आता भारताच्या टी 20 वर्ल्डकप संघात निवडला गेला आहे. वेस्ट इंडीज आणि अमेरिकेत हा वर्ल्डकप 1 जून पासून सुरू होत आहे. विराट कोहली हा 2011 च्या वनडे वर्ल्डकप विजेत्या संघाचा भाग होता. मात्र भारताने बऱ्याच काळापासून वर्ल्डकप जिंकलेला नाही. युवराज सिंगच्या मते विराट कोहली हा वर्ल्डकप मेडलचा सर्वात जास्त हकदार आहे.

आयसीसीशी बोलताना टी 20 वर्ल्डकप 2024 चा ब्रँड एम्बेसडर युवराज म्हणाला की, 'नक्कीच विराट कोहलीने या जनरेशनमधील सर्व रेकॉर्ड मोडले आहेत. तो या जनरेशनचा सर्वोत्तम फलंदाज आहे. मला वाटते की तीनही फॉरमॅटमधील हा एक असा व्यक्ती आहे ज्याला वर्ल्डकप मेडलची गरज आहे. त्याच्या जवळ एक आहे. मात्र मला माहिती आहे की तो यावर समाधानी नाही. मला वाटतं की तो यंदाच्या वर्ल्डकप मेडलचा हकदार आहे.'

युवराज पुढे म्हणाला की, 'मला वाटते की तो त्याचा बेस्ट गेम कोणता आहे हे जाणतो. त्याला माहिती आहे की तो शेवटपर्यंत टिकला तर भारतासाठी मॅच जिंकणं सोपं होतं. तो परिस्थिती लगेच ओळखतो, कोणत्या स्थितीत कशी फलंदाजी करायची आहे.'

'कोणत्या गोलंदाजाविरूद्ध आक्रमण करायचं अन् कोणत्या गोलंदाजाविरूद्ध सिंगल्स घ्यायच्या हे त्याला माहिती आहे. दबावात आपला खेळ कसा बदलायचा हे त्याला चांगला ठाऊक आहे.'

(Cricket Marathi News)