Cristiano Ronaldo Retirement : पोर्तुगालचा स्टार फुटबॉलपटू ख्रिस्तीयानो रोनाल्डो सध्या चांगलाच चर्चेत आहे. मँचेस्टर युनायटेडबरोबर सुरू असलेल्या वादावर रोनाल्डोने कतार वर्ल्डकप सुरू होण्यापूर्वीच भाष्य करत मोठी खळबळ उडवून दिली होती. आता या मुलाखतीचा दुसरा भाग प्रसिद्ध झाला आहे. या भागात ख्रिस्तीयानो रोनाल्डोला त्याचा प्रतिस्पर्धी लिओनेल मेस्सी संदर्भात एक मजेदार प्रश्न ब्रिटीश पत्रकार मॉर्गन यांनी विचारला. यावर रोनाल्डोने थेट निवृत्तीचीच भाषा केली.

मॉर्गन यांनी रोनाल्डोसमोर एक परिस्थिती निर्माण केली. मॉर्गन म्हणाले की, टजर पोर्तुगाल फिफा वर्ल्डकपच्या अंतिम फेरीत दाखल झाला. त्यांचा सामना अर्जेंटिनाशी होणार आहे. तू सामन्यात दोन गोल केलेस. त्यानंतर मेस्सीने दोन गोल करत बरोबरी केली. सामन्याच्या 94 व्या मिनिटाला तू गोलची हॅट्ट्रिक साधलीस आणि पोर्तुगाल वर्ल्डकप जिंकला.'

या स्वप्नातील कल्पनेवर रोनाल्डो म्हणाला की हे खूप भारी आहे. रोनाल्डो पुढे म्हणाला की, मैदानावर जरी पोर्तुगालच्या गोलकिपरने जरी गोल केला आणि माझा संघ जिंकला तरी मी जगातील सर्वात आनंदी व्यक्ती असेन. दरम्यान, रोनाल्डोने मॉर्गन यांच्या प्रश्नाला उत्तर देताना म्हणाला की, 'जर असं झालं तर मी फुटबॉलमधून निवृत्ती घेईन.'

रोनाल्डोने निवृत्ती घेण्याचे वक्तव्य गमंतीने केले. या मुलाखतीत रोनाल्डोने मेस्सीची स्तुती देखील केली. गेल्या 15 वर्षात मेस्सी आणि रोनाल्डो हे फुटबॉल जगतावर अधिराज्य गाजवणारे दोन खेळाडू ठरले आहेत. दरम्यान, रोनाल्डो त्याच्या निवृत्तीबाबत काय प्लॅन्स आहे हे सांगताना म्हणाला की तो वयाच्या 40 व्या वर्षापर्यंत फुटबॉल खेळण्यास उत्सुक आहे.

रोनाल्डो त्याच्या निवृत्तीबाबत म्हणाला की, 'मी अजून दोन ते तीन वर्षे तरी फुटबॉल खेळू इच्छितो. मला माझी फुटबॉल कारकिर्द ही वयाच्या 40 व्या वर्षी संपवायची आहे. मला वाटते की यासाठी 40 हे योग्य वय आहे. मात्र भविष्याबद्दल मी आताच काही सांगू शकत नाही. तुम्ही तुमच्या आयुष्यात काही प्लॅन्स केलेले असतात मात्र आयुष्य बदलत असतं तुम्हाला काय होईल हे माहिती नसतं.'