नवी दिल्ली : भारताचा १७ वर्षीय डी. गुकेश याने रविवारी आव्हानवीरांच्या बुद्धिबळ स्पर्धेत अजिंक्यपदावर मोहर उमटवताना ऐतिहासिक कामगिरी केली. जागतिक स्पर्धेसाठी पात्र ठरलेल्या गुकेशवर चोहोबाजूंनी कौतुकाचा वर्षाव होऊ लागला. याच पार्श्वभूमीवर रशियाचे महान बुद्धिबळपटू गॅरी कॅस्पारोव यांनीही गुकेशच्या पाठीवर कौतुकाची थाप मारताना म्हटले की, टोरांटोमध्ये भारतीय वादळ आले.

गॅरी कॅस्पारोव यांनी वयाच्या २२व्या वर्षी १९८४मध्ये आव्हानवीरांची बुद्धिबळ स्पर्धा जिंकत जगज्जेतेपदासाठीच्या लढतीत ॲनातली कारपोव यांच्याशी दोन हात केले. डी. गुकेश याने यंदाच्या आव्हानवीरांच्या बुद्धिबळ स्पर्धेत अजिंक्यपदाचा मान संपादन केला. तोही वयाच्या १७व्या वर्षी. त्याने कॅस्पारोव यांचा ४० वर्षांपूर्वीचा विक्रम मोडीत काढला. याप्रसंगी कॅस्पारोव यांनी सोशल मीडियावर गुकेशची स्तुति करताना म्हटले की, टोरांटोमध्ये डी. गुकेशच्या रूपात भारतीय वादळ आले. जागतिक बुद्धिबळाच्या पटावर नवी क्रांती घडून आली. आता जगज्जेतेपदाच्या लढतीत गुकेशसमोर चीनच्या डिंग लिरेन याचे आव्हान असेल. गुकेशचे अभिनंदन!

गॅरी कॅस्पारोव यांनी आपले मत व्यक्त करताना जागतिक बुद्धिबळातील रशियन खेळाडूंच्या वर्चस्वाला तडा गेल्याचे स्पष्टपणे सांगून टाकले. याचसोबत आता भारतीय खेळाडू बुद्धिबळ या खेळामध्ये पुढे येऊ लागले असून ते वर्चस्व गाजवत आहेत, याकडे कॅस्पारोव यांचा कल होता.

आनंद यांच्यामुळे युवा खेळाडू घडले

गॅरी कॅस्पारोव यांनी विश्‍वनाथन आनंद यांचेही मनभरून कौतुक केले. ते म्हणाले, विश्‍वनाथन आनंद यांनी भारतामध्ये बुद्धिबळ या खेळाला महत्त्व प्राप्त करून दिले. याच कारणामुळे भारतात आता बुद्धिबळातील स्टार खेळाडू घडू लागले आहेत. आनंद यांच्या मार्गदर्शनाखाली भारतामध्ये बुद्धिबळपटूंचा विकास होत आहे.

बुद्धिबळाचा वेगाने प्रसार

काही वर्षांपूर्वीपर्यंत बुद्धिबळ या खेळामध्ये रशियन खेळाडूंचे एक हाती वर्चस्व असायचे; पण आता सर्व काही बदलले आहे. याबाबत गॅरी कॅस्पारोव म्हणाले, अमेरिका, इंग्लंड या देशांमध्येही अव्वल दर्जाच्या खेळाडूंची कमी नाही. भारत व चीनमध्ये एकापेक्षा एक असे युवा बुद्धिबळपटू जन्माला येत आहेत. बुद्धिबळ या खेळाचा वेगाने प्रसार व प्रचार होत आहे.