ऑस्ट्रेलियाचा सलामीवीर डेविड वॉर्नर (David Warner) सोशल मीडियावर चांगलाच सक्रीय असतो. कांगारुंचा ताफा अ‍ॅशेस कसोटी मालिकेतील पहिल्या विजयाच्या सेलिब्रेशन मूडमध्ये असताना वॉर्नरने सोशल मीडियाच्या माध्यमातून एक खास व्हिडिओ शेअर केलाय. हा व्हिडिओ तुफान व्हायरल होताना दिसतोय.

डेविड वार्नरने अल्लू अर्जुनच्या ‘पुष्पा- द राइज’ चित्रपटातील गाण्यावर ठुमके लगावले आहेत. वॉर्नरने फेस स्वॅपचा वापर करुन केलेली कलाकृती चांगलीच व्हायरल होत आहे. भारतीय कसोटी संघाचा कर्णधार विराट कोहली त्याचा हा नवा अवतार पाहून हैराण झालाय. तो बरा तर आहेस ना!, अशा आशयाची प्रतिक्रिया कोहलीने वॉर्नरने शेअर केलेल्या व्हिडिओवर दिलीये.

डेविड वॉर्नर अ‍ॅशेस मालिकेत (Ashes Series) व्यस्त असला तरी मोकळ्या वेळेत तो सोशल मीडियावर आपली सक्रीयता कायम ठेवताना दिसते. अ‍ॅशेस कसोटी मालिकेतील पहिला सामना ब्रिस्बेनच्या गाबा मैदानावर रंगला होता. हा सामना जिंकून पॅट कमिन्सच्या नेतृत्वाखालील ऑस्ट्रेलियन संघाने मालिकेत 1-0 अशी आघाडी घेतली आहे. पहिल्या कसोटी सामन्यात पहिल्या डावात वॉर्नरने 94 धावांची धमाकेदार खेळी केली होती.

ऑस्ट्रेलिया संघाच्या विजयानंतर आनंद व्यक्त करण्यासाठी वॉर्नरने इन्स्टाग्रामच्या माध्यमातून व्हिडिओ शेअर केलाय. या व्हिडिओमध्ये तो ‘आई बिड्डा इधि ना अड्डा’ या गाण्यावर नाचताना दिसते. या निमित्ताने ऑस्ट्रेलियन क्रिकेटरचे टॉलीवूड प्रेम पुन्हा एकदा दिसून आले आहे. वॉर्नरचा हा व्हिडिओ 16 लाखांहून अधिक जणांनी पाहिला आहे. विराट कोहली (Virat Kohli) ने या व्हिडिओवर कमेंट दिली आहे. विराटने लिहलंय की, ‘यार तुम ठीक तो हो?’ सार्वजनिक रित्या कोहलीने वॉर्नरची फिरकी घेण्याचा प्रयत्नच यातून केल्याचे दिसते.