टीम इंडियाचा माजी कर्णधार एमएस धोनीशी संबंधित एक मोठी बातमी समोर आली आहे. धोनीचा माजी बिझनेस पार्टनर मिहिर दिवाकर आणि दिवाकरची पत्नी सौम्या दास यांनी दिल्ली उच्च न्यायालयात मानहानीचा खटला दाखल केला आहे. नुकतेच धोनीने आपल्या दोन जुन्या व्यावसायिक भागीदारांवर फसवणुकीचा आरोप केला होता. हे संपूर्ण प्रकरण 15 कोटी रुपयांशी संबंधित आहे.

पीटीआयच्या रिपोर्टनुसार, माहीचा बिझनेस पार्टनर धोनीविरोधात मानहानीचा खटला दाखल केला आहे. मिहिर दिवाकर आणि त्याची पत्नी सौम्या दास यांनी धोनीविरोधात दिल्ली उच्च न्यायालयात मानहानीचा खटला दाखल केला आहे.

मिहिर दिवाकर म्हणतो की, त्याने धोनीसोबत कोणतीही फसवणूक केलेली नाही, तरीही सोशल मीडियावर त्याला ट्रोल केले जात आहे. धोनीने त्याच्या विरोधात चुकीच्या बातम्या पसरवल्या आहेत, त्यामुळे त्याचा खूप अपमान झाला आहे. याच कारणावरून मिहिर दिवाकर आणि त्याच्या पत्नीने धोनीविरोधात तक्रार दाखल केली आहे.

काय आहे संपूर्ण प्रकरण

या प्रकरणाची सुनावणी 18 जानेवारी रोजी दिल्ली उच्च न्यायालयात होणार आहे. न्यायमूर्ती प्रतिभा एम सिंग यांच्या खंडपीठासमोर उद्या धोनीविरोधातील याचिकेवर सुनावणी होणार आहे. धोनीने स्पोर्ट्स मॅनेजमेंट कंपनी 'अर्का स्पोर्ट्स'चे संचालक मिहिर दिवाकर आणि त्याची पत्नी सौम्या दास यांच्याविरोधात गुन्हा दाखल केला होता.

या खटल्याची माहिती देताना धोनीच्या वकिलाने सांगितले की, मिहिर दिवाकर आणि त्याची पत्नी सौम्या दास यांनी 2017 मध्ये धोनीशी भारतात आणि परदेशात क्रिकेट अकादमी स्थापन करण्याबाबत बोलले होते. या व्यवसायात असा करार झाला होता की नफा धोनी आणि त्याच्या व्यावसायिक भागीदारामध्ये सरासरी 70:30 टक्के विभागला जाईल, परंतु धोनीच्या भागीदाराने पैसे देण्यास नकार दिला. त्यामुळे हा वाद सुरू आहे.