‘फ’ गटात चांगली चुरस पाहायला मिळणार आहे. या गटात गत स्पर्धेत मोठी मजल मारणारे बेल्जियम आणि क्रोएशिया हे दोन संघ आहेत. क्रोएशिया उपविजेते आहेत, तर बेल्जियमने तिसरा क्रमांक मिळवला होता.

बेल्जियम : रँकिंग : २

गेल्या दोन स्पर्धांमध्ये उपांत्यपूर्व फेरी गाठणारा संघ, मात्र गेल्या दोन स्पर्धांतील खेळाडू आत्ताच्या संघात नाहीत. असे असले तरी गटात अव्वल स्थान मिळवण्याची शक्यता. केविन डी ब्रुयन आणि लुमामी लुकाकू प्रमुख खेळाडू. यंदाच्या क्लब फुटबॉल मोसमात लिओनेल मेस्सीनंतर सर्वाधिक यशस्वी पास देणारा खेळाडू डी ब्रुयन आहे. हाच फॉर्म कायम असला तर लुकाकूला गोल करण्याची अधिक संधी.

क्रोएशिया : रँकिंग : १२

क्रोएशिया आणि बेल्जियम यांच्यातील लढत ग्रुप लिडर ठरवणार असली तरी क्रोएशियाला अधिक शर्थ करावी लागणार. गत स्पर्धा लुका मॉड्रिकने गाजवली होती. गोल्डन बॉल हा प्रतिष्ठेचा पुरस्कारही त्याने मिळवला होता, परंतु यंदा सातत्य राखण्याचे आव्हान.

मोरोक्को : रँकिंग : २२

मोरोक्कोसाठी कतार हे ठिकाण लाभदायी ठरले नाही. मागच्या वेळी येथे झालेल्या अरब कप स्पर्धेत मोरोक्कोचे आव्हान उपांत्यपूर्व फेरीत संपुष्टात आले होते. आता बेल्जियम आणि क्रोएशिया असे संघ असल्यामुळे बाद फेरी गाठण्याची शक्यता कमी.

कॅनडा : रँकिंग : ४१

कॅनडाचा संघ १९८६ नंतर प्रथमच विश्वकरंडक स्पर्धेसाठी पात्र ठरला आहे. कतारमधील परिस्थितीशी ते कसे जुळवून घेतात हे महत्त्वाचे. पात्रता स्पर्धेत २३ गोल करताना सातच गोल स्वीकारले ही जमेची बाजू; परंतु गटामध्ये बेल्जियम आणि क्रोएशिया या मात्तबर संघांसमोर बचाव खेळाचा कस लागणार.