कतार : विश्वकरंडक फुटबॉल स्पर्धेत आता सर्वांत महत्त्वाच्या अंतिम सामन्यासह मोजक्या चार लढती शिल्लक आहेत आणि त्याकरिता स्पर्धेसाठी चेंडू तयार करणाऱ्या आदिदास या कंपनीने नवे फुटबॉल तयार केले आहेत. आतापर्यंतच्या सामन्यांसाठी वापरण्यात आलेल्या चेंडूंना ‘यशस्वी प्रवास’ (अल रिह्ला) असे नाव देण्यात आले होते; मात्र आता पुढच्या लढतींसाठी ‘स्वप्नांचे सौदगर’ (अल हिलम) असे नाव देण्यात आले आहे.

नवे नामकरण करण्यात येणारे आणि नव्याने तयार करण्यात आलेले हे चेंडू मंगळवारी होणाऱ्या अर्जेंटिना-क्रोएशिया आणि बुधवारी होणाऱ्या गतविजेत्या फ्रान्स-मोरोक्को उपांत्य सामन्यात खेळवण्यात येतील. त्यानंतर शनिवारच्या तिसऱ्या क्रमांकाच्या लढतीनंतर रविवारच्या अंतिम सामन्यात हे चेंडूही आकर्षण ठरतील. स्पर्धेतील आतापर्यंतच्या सर्व सामन्यांसाठी वापरण्यात आलेल्या चेंडूंमध्ये जे तंत्रज्ञान होते तेच तंत्रज्ञान नव्या चेंडूतही असणार आहे. या चेंडूमध्ये सेन्सर असलेली चिप आहे. त्यातून मिळणाऱ्या माहितीचा फायदा रेफ्रींना ऑफसाईड आणि इतर महत्त्वाचे निर्णय देताना होत आहे, असे फिफाने स्पष्ट केले.