दोहा : अर्जेंटिना आणि पोलंड असा उद्याचा सामना दोघांसाठी बाद फेरीचे भवितव्य निश्‍चित करणारा आहे; परंतु या लढतीकडे लिओनेल मेस्सी विरुद्ध त्याच्याच पूर्वाश्रमीच्या बार्सिलोना क्लबमधील सहकारी रॉब्रेट लेवांडोवस्की यांच्यातही रंगणार आहे. विश्वकरंडक फुटबॉल स्पर्धेत क गटात कमालीची चुरस निर्माण झाली आहे. सद्यपरिस्थितीत पोलंडचे एक पाऊल पुढे असले, तरी उद्याच्या लढतीत पराभूत होणाऱ्या संघाचे आव्हान संपुष्टात येणार आहे. मेस्सी ३५ वर्षांच तर लेवांडोवस्की ३४ वर्षांचा आहे. ही विश्वकरंडक स्पर्धा दोघांसाठी अखेरची असणार आहे. त्यामुळे एका खेळाडूचा विश्वकरंडक स्पर्धेतला सूर्यास्त होणार, हे निश्चित आहे.

सलामीच्या सामन्यात सौदी अरेबियाकडून पराभूत झाल्यामुळे अर्जेंटिनावर अखेरच्या सामन्यापर्यंत जीव टांगणीला राहण्याची परिस्थिती ओढावली आहे. मात्र त्या सामन्यानंतर मेक्सिकोविरुद्धच्या सामन्यातही मेस्सीने गोल करून अर्जेंटिनाच्या आव्हानात हवा भरली आहे. मेस्सीची ही पाचवी विश्वकरंडक स्पर्धा असून अर्जेंटिनाला पुन्हा विश्वविजेतेपद मिळवून देण्यासाठी त्याच्याकडून मोठ्या अपेक्षा आहेत. पोलंडविरुद्धच्या लढतीत आत्मविश्वासाने सामोरे जाण्यासाठी आम्ही मेक्सिकोला हरवून दडपण दूर केले, असे मेस्सी म्हणाला.

मेस्सीप्रमाणे लेवांडोवस्कीही त्याच्या देशाकडून सर्वाधिक गोल करणारा खेळाडू आहे. दोघे एकत्र बार्सिलोना क्लबमधून खेळलेले असल्यामुळे एकमेकांचे खेळ ते चांगलेच जाणतात. मेस्सीने सौदी अरेबियाविरुद्धच्या सामन्यात सुरुवातीला मिळालेल्या पेनल्टी कीकवर गोल केला होता; तर मेक्सिकोविरुद्धच्या लढतीत पोलंडला मिळालेल्या पेनल्टीवर लेवांडोवस्की गोल करू शकला नव्हता. परिणामी तो सामना गोलशून्य बरोबरीत सुटला होता. त्यानंतर लेवांडोवस्कीने विश्वकरंडक स्पर्धेत आपला पहिलावहिला गोल केला. त्यामुळे पोलंडने सौदी अरेबियावर २-० अशी मात केली होती.

मी जेवढा वयस्क होत आहे तेवढा मी भावूक होत आहे, ही विश्वकरंडक स्पर्धा आपल्यासाठी अखेरची स्पर्धा आहे, याची मला जाणीव आहे. त्यामुळे मी अधिक भावनिक आहे, असे लेवांडोवस्की म्हणाला. १९८६ नंतर पोलंडने विश्वकरंडक स्पर्धेची बाद फेरी गाठलेली नाही. उद्या अर्जेंटिनावर विजय किंवा बरोबरी त्यांना पुढचे पाऊल टाकण्यास पुरेशी असेल.