सौदी अरेबिया : अल खोबार येथे झालेल्या १७ वर्षांखालील आशियाई करंडक पात्रता स्पर्धेच्या ड गटाच्या सामन्यात भारताने थांगलालसौन गंगटेच्या २ गोलच्या जोरावर कुवेतचा ३-० असा पराभव करत स्पर्धेतील दुसरा सामना जिंकला.

सामन्याच्या सुरुवातीपासूनच आक्रमक खेळ करणाऱ्या भारतीय संघाने ९ व्या मिनिटाला आपला पहिला गोल नोंदवला होता; मात्र गंगटेने फाऊल केल्यामुळे भारताची नामी संधी हुकली. गंगटेने १६ व्या मिनिटाला गोल करत भारताला १-० अशी आघाडी मिळवून दिली.

आक्रमक फळीत खेळणाऱ्या कोरोउ सिंग याने ६६ व्या मिनिटाला गोल करत भारताला २-० अशी आघाडी मिळवून दिली; तर ७१ व्या मिनिटाला गंगटेने लालपेखलुआच्या अप्रतिम पासवर आपला दुसरा; तर भारताचा तिसरा गोल झाला.

कुवेत विरुद्दच्या सामन्यात भारताच्या आक्रमक फळीत खेळणाऱ्या खेळाडूंनी संयमी खेळ केला. गोलरक्षक साहिलने अप्रतिम गोलरक्षण करत भारताच्या विजयात मोलाचे योगदान उचलले. भारताचा पुढील तिसरा सामना म्यानमारशी रविवारी होणार असून; पहिल्या सामन्यात भारताने मालदीवचा ५-० असा दणदणीत पराभव केला होता.