Commonwealth Games 2022 : भारताची वेटलिफ्टर हरजिंदर कौरने 71 किलो वजनीगटात भारताला कांस्य पदक पटकावून दिले. तिने एकूण 212 किलो वजन उचलले. यात स्नॅच प्रकारात 93 किलो तर क्लीन अँड जर्क प्रकारात 119 किलो वजन उचलले. भारताचे हे दिवसातले तिसरे पदक ठरले. यामुळे भारताची पदक संख्या 9 वर पोहचली. वेटलिफ्टिंगमधून हे भारतासाठीचे सातवे पदक ठरले. विशेष म्हणजे हरजिंदर कौर चौथ्या स्थानावर राहील असे वाटत होते. मात्र शेवटच्या क्षणी नायजेरियन वेटलिफ्टरला क्लीन अँड जर्कचा शेवटचा प्रयत्न फसला आणि कौरच्या गळ्यात कांस्य पदक पडले.

भारतीय खेळाडूंनी बर्मिंगहॅममध्ये चौथ्या दिवशी देखील आपली ताकद दाखवायला सुरुवात केली. भारताने कॉमनवेल्थ गेम्समध्ये आतापर्यंत सहा पदके जिंकली असून ही सर्व पदके वेटलिफ्टिंग मधून आली आहे. आज चौथ्या दिवशी भारतीय महिला लॉन बॉल संघाने इतिहास रचत राष्ट्रकुल स्पर्धेत पहिल्यांदाच अंतिम फेरी गाठली. त्यांनी रौप्य पदक पक्के केले.

त्याचबरोबर महिला ज्यूडो स्पर्धेत 48 किलो महिला वजनी गटात सुशिला देवीने रौप्य पदक पटकावले. ज्यूदोमध्येच पुरूष 60 किलो वजनी गटात विजय कुमार यादवने भारतला कांस्य पदक पटकावून दिले. यानंतर अखेरच्या क्षणी वेटलिफ्टर हरजिंदर कौरने 71 किलो वजनी गटात भारताला कांस्य पदक मिळवून देत पदक संख्या 9 वर नेली. वेटलिफ्टिंगमधून भारताला 7 वे पदक मिळाले.