क्रीडा जगतातील सर्वोच्च पुरस्कार असलेल्या राजीव गांधी खेलरत्न पुरस्कारासाठी हॉकी इंडियाने दोन दिग्गज खेळाडूंच्या नावाची शिफारस केलीये. भारतीय संघाचा विद्यमान गोलकिपर पीआर श्रीजेश आणि माजी महिला हॉकीपटू दिपिका ठाकूर यांचा यात समावेश आहे. हॉकी इंडियाने शनिवारी त्यांच्या नावाची शिफारस केल्याची घोषणा केली. या दोन खेळाडूंशिवाय हरमनप्रित सिंग, वंदना कटारिया आणि नवजोत कौर यांच्या नावाची अर्जुन पुरस्काराची शिफारस करण्यात आलीये.

राजीव गांधी खेलरत्न पुरस्कारासाठी 1 जानेवारी 2017 ते डिसेंबर 2020 या कालावधीत केलेल्या कामगिरीचा विचार करण्यात आलाय. पीआर श्रीजेश याने भारतीय हॉकी संघातून लक्षवेधी कामगिरी केलीये. 2018 मध्ये हॉकी चॅम्पियन्स ट्रॉफीमध्ये टीम इंडियाने रौप्य कामगिरी केली होती. 2018 मधील आशियाई क्रीडा प्रकारात टीम इंडियाने कांस्य पदक मिळवले होते. 2019 मध्ये भुवनेश्वरमध्ये झालेल्या FIH Men's Series Finals मध्ये टीम इंडियाने सुवर्ण कामगिरी नोंदवली होती. यात श्रीजेशने मोलाचा वाटा उचलला होता. यापूर्वी श्रीजेशला 2015 मध्ये अर्जुन पुरस्कार तर 2017 मध्ये पद्मश्री पुरस्काराने सन्मानित करण्यात आले आहे.

दिपिका ठाकूर हिने भारतीय महिला संघात लक्षवेधी कामगिरी बजावलीये. 2018 मध्ये आशियाई क्रीडा प्रकारासह आशियाई चॅम्पियन्स ट्रॉफी स्पर्धेत भारतीय महिला संघाने रौप्य पदकाची कमाई केली होती. यात दिपिकाचा मोलाचा वाटा होता.