नवी दिल्ली : थायलंडच्या कुनलावूत वितिदसर्न याच्याकडून उपांत्य फेरीत पराभूत झाल्यामुळे भारताच्या एच. एस. प्रणॉय याच्या जागतिक बॅडमिंटन स्पर्धेमध्ये सुवर्णपदक जिंकण्याच्या आशांना सुरुंग लागला; मात्र जागतिक स्पर्धेमध्ये ब्राँझपदक पटकावणाऱ्या प्रणॉयने देशासाठी मौल्यवान कामगिरी केली होती.

याच पार्श्वभूमीवर प्रणॉय म्हणाला, गेली १२ वर्षे आंतरराष्ट्रीय स्तरावर खेळत आहे. त्यामुळे जागतिक स्पर्धेतील पदकाचे मोल मोठे आहे. मला सुवर्णपदक पटकावता आले नसले तरी ब्राँझपदक मिळवल्याचे समाधान आहे.

भारताचा अनुभवी खेळाडू पुढे म्हणाला, बऱ्याच व्यक्तींच्या सहकार्यामुळे मला इथपर्यंत मजल मारता आली आहे. माझ्या संपूर्ण कुटुंबियांचाही मोलाचा पाठिंबा होता. सराव व स्पर्धा यामुळे वर्षभर कुटुंब व मित्रांपासून दूर राहावे लागते. हा प्रवास खडतर असतो. त्यामुळे जागतिक स्पर्धेतील पदक मौल्यवान ठरते. त्यामुळे आगामी काळात चांगली कामगिरी करण्याची प्रेरणा मिळते.

उपांत्य फेरीच्या लढतीत प्रणॉयने पहिला गेम जिंकत आघाडी घेतली होती. दुसऱ्या गेममध्येही त्याच्याकडे ५-१ अशी आघाडी होती, पण त्यानंतरही प्रणॉयला या लढतीत विजय मिळवता आला नाही. या वेळी प्रणॉय म्हणाला, जेव्हा तुम्ही कोर्टवर खेळत असता,

तेव्हा तुम्ही सर्वोत्तम प्रयत्न केल्याचे वाटते, पण लढत संपल्यानंतर कामगिरीत आणखी सुधारणा करता येऊ शकल्या असत्या असे वाटू लागते; मात्र उपांत्य लढतीआधीच्या दोन लढती तीन गेमपर्यंत रंगल्या होत्या. त्यामुळे शारीरिकदृष्ट्या मी थकलो होतो. प्रतिस्पर्ध्याकडून अव्वल दर्जाचा खेळ करण्यात आला, असे प्रणॉय म्हणाला.

बॅडमिंटन या खेळामध्ये तांत्रिक बाबींना महत्त्व असते. त्यामुळे अव्वल स्तरावर खेळण्यासाठी तुमच्या शरीराने साथ द्यायला हवी. वयाच्या ३५ किंवा ३६ व्या वर्षी त्याच वेगाने खेळण्याचे आव्हानात्मक ठरते. असंख्य युवा खेळाडू येत आहेत. त्यांच्यासमोर कमीत कमी चुका कराव्या लागतात. त्यांच्यासोबत बॅडमिंटन कोर्टवर खेळताना तुमचा वेग कमी झाल्यास आंतरराष्ट्रीय स्तरावर निभाव लागू शकत नाही.

- एच. एस. प्रणॉय,ब्राँझपदक विजेता, जागतिक स्पर्धा