T20 World Cup 2021 Oman vs Papua New Guinea 1st Match :ओमानच्या अकिब इलियास आणि जतिंदर सिंग या सलामी जोडीनं केलेल्या नाबाद अर्धशतकाच्या जोरावर ओमानच्या संघाने टी-20 वर्ल्ड कप स्पर्धेत विजयी सलामी दिली. पापुआ न्यू गिनी संघाने पहिल्यांदा फलंदाजी करताना 129 धावा करुन ओमान समोर 130 धावांचे आव्हान ठेवले होते. सलामी जोडीनंच हे आव्हान पार केले.

इलियासने 5 चौकार आणि एका षटकाराच्या मदतीने 43 चेंडूत 50 धावांची नाबाद खेळी केली. दुसरीकडे भारतीय वंशाचा जतिंदर सिंगने 7 चौकार आणि 4 षटकाराच्या मदतीने 42 चेंडूत 73 धावांची खेळी केली. चौदाव्या षटकातील चौथ्या चेंडूवर अमिनीच्या चेंडूवर उत्तुंग षटकार खेचत अर्धशतकासह इलियासने संघाच्या विजयावर शिक्कामोर्तब केले.

पापुआ न्यू गिनीचा कर्णधार असद वला 56, चार्ल्स अमीनी 37 आणि सेसे बाऊ 13 धावा वगळता अन्य कोणत्याही दुहेरी आकडा पार करता आला नाही. परिणामी ओमानच्या गोलंदाजीसमोर पापुआ न्यू गिनी संघाला निर्धारित 20 षटकात 9 बाद 129 धावांपर्यंतच मजल मारता आली. ही धावसंख्या ओमानच्या सलामीवीरानीच पार करुन दाखवली. दोन गुणासह आता ते आपल्या गटात अव्वलस्थानी पोहचले आहेत.

सुपर 12 साठी 8 संघात लढत

सुपर-12 राउंडमध्ये पात्रता सिद्ध करण्यासाठी 8 संघ क्वॉलिफायर राउंडमध्ये भिडणार आहेत. ग्रुप अ मध्ये श्रीलंका, आयर्लंड, नामीबीया आणि नेदरलँड या संघांचा समावेश आहे. तर ब गटात बांगलादेश, ओमान, स्कॉटलंड आणि पापुआ न्यू गिनी यांचा समावेश आहे. या दोन गटातील अव्वल दोन संघ सुपर 12 साठी पात्र ठरतील.