World Cup Squad Team India : एकदिवसीय वर्ल्ड कप 2023ची उलटी गिनती सुरू झाली आहे. ही स्पर्धा 5 ऑक्टोबरपासून सुरू होणार असून अंतिम सामना 19 नोव्हेंबरला होणार आहे. वर्ल्ड कप 2023 साठी भारतीय संघाची घोषणा 5 सप्टेंबर रोजी होणार आहे.

दरम्यान, याआधी भारतीय संघाचा माजी क्रिकेटपटू गौतम गंभीरने आपला आवडता भारतीय संघ निवडला होता. आशिया कपसाठी भारतीय संघात 17 खेळाडूंची निवड करण्यात आली होती आणि संजू सॅमसनला बॅकअप यष्टिरक्षक म्हणून श्रीलंकेला पाठवण्यात आले होते, मात्र वर्ल्ड कपसाठी केवळ 15 खेळाडूंची निवड केली जाईल.

गौतम गंभीरने स्टार स्पोर्ट्सवर भारताचा वर्ल्ड कप संघ निवडला आणि त्याने ऑफस्पिनर वॉशिंग्टन सुंदरचा आपल्या संघात समावेश केला. तमिळनाडूच्या या क्रिकेटपटूची आशिया कप 2023 साठी भारतीय संघात निवड झाली नाही.

गंभीरने आपल्या संघात श्रेयस अय्यर, तिलक वर्मा आणि शार्दुल ठाकूरची निवड केली नाही. श्रेयस अय्यर आणि शार्दुल ठाकूर यांची आशिया कप 2023 साठी भारतीय संघात निवड करण्यात आली आहे.

भारतीय परिस्थिती लक्षात घेऊन गंभीरने जसप्रीत बुमराह, मोहम्मद शमी, मोहम्मद सिराज आणि प्रसिद्ध कृष्णा या चार वेगवान गोलंदाजांना आपल्या संघात समाविष्ट केले आहे. त्याचबरोबर रोहित शर्मा, विराट कोहली, शुभमन गिल आणि सूर्यकुमार यादव यांची निवड केली आहे. त्याने केएल राहुल आणि इशान किशन यांना संघात यष्टिरक्षक-फलंदाज म्हणून निवडले.

युझवेंद्र चहलला आपल्या संघात स्थान दिले नाही. फलंदाजीत सखोलतेसाठी त्याने रवींद्र जडेजा, अक्षर पटेल आणि वॉशिंग्टन सुंदर यांना संघात फिरकी अष्टपैलू म्हणून स्थान दिले. त्याचबरोबर वेगवान गोलंदाज अष्टपैलू म्हणून त्याने हार्दिक पांड्याला आपल्या संघात ठेवले.

गौतम गंभीरचा भारताचा एकदिवसीय वर्ल्ड कप संघ : रोहित शर्मा (कर्णधार), शुभमन गिल, विराट कोहली, सूर्यकुमार यादव, केएल राहुल, इशान किशन, अक्षर पटेल, हार्दिक पंड्या, रवींद्र जडेजा, वॉशिंग्टन सुंदर, प्रसिद्ध कृष्णा, मोहम्मद सिराज, कुलदीप यादव, जसप्रीत बुमराह. मोहम्मद शमी.