Ind vs Afg T20I Series News Mohali Weather Forecast : भारत आणि अफगाणिस्तान यांच्यातील मालिका आजपासून सुरू होत आहे. 3 टी-20 सामन्यांच्या मालिकेतील पहिला सामना आज पंजाबच्या मोहाली क्रिकेट स्टेडियमवर खेळला जाणार आहे.

टी-20 क्रिकेटसाठी तमाम क्रिकेट चाहत्यांमध्ये प्रचंड उत्साह पाहायला मिळत आहे. कारण या सामन्यात भारताचा दिग्गज खेळाडू रोहित शर्माही बऱ्याच दिवसांनी टी-20 खेळताना दिसणार आहे.

भारत आणि अफगाणिस्तान यांच्यात होणार्‍या पहिल्या टी-20 आंतरराष्ट्रीय सामन्याला पावसाचा धोका नसून थंडीचा मोठा धोका आहे. मोहालीमध्ये सध्या प्रचंड थंडी आहे. पहिल्या टी-20 आंतरराष्ट्रीय सामन्यावर दव आणि धुक्याचा जबरदस्त परिणाम होऊ शकतो.

पहिल्या टी-20 सामन्याआधी मोहालीच्या हवामानाची बरीच चर्चा आहे. जानेवारी महिन्यात थंडी, दव आणि धुक्याचा प्रभाव मोहालीत अनेकदा दिसून येतो. आज, गुरुवारी सामन्याच्या दिवशी मोहालीमध्ये किमान तापमान 5-6 अंश सेल्सिअसच्या आसपास राहण्याची शक्यता आहे. सूर्यास्तानंतर प्रचंड दव पडणार आहे. त्यामुळे सामन्यात धुके एक मोठी समस्या असू शकते.

मोहालीच्या पंजाब क्रिकेट असोसिएशन (PCA) स्टेडियमवर जानेवारीच्या हिवाळ्यात डे-नाईट टी-20 आंतरराष्ट्रीय सामना आयोजित करण्याची ही पहिलीच वेळ असणार आहे. उत्तर भारतात सध्या धुक्यासह थंडीची लाट असून त्यामुळे जनजीवन विस्कळीत झाले आहे. मोहाली येथे होणाऱ्या पहिल्या टी-20 सामन्यात भारत आणि अफगाणिस्तानच्या खेळाडूंना थंडीचा सामना करावा लागणार आहे. दव असल्याने गोलंदाजांना चेंडूवर पकड घेणे कठीण होणार आहे.

पंजाब क्रिकेट असोसिएशनचे (पीसीए) मुख्य क्युरेटर राकेश कुमार म्हणाले, 'पीसीए हिवाळ्यात देशांतर्गत सामने आयोजित करत आहे, परंतु ते दिवसा आयोजित केले जातात. सुदैवाने गेल्या दोन-तीन दिवसांत धुके कमी झाले आहे. दव दूर ठेवण्यासाठी आजपासून आम्ही मैदानात रसायनाचा वापर करणार आहे.