Ind vs Eng 2nd Test Day 5: भारतीय संघाच्या नवव्या आणि दहाव्या क्रमांकाच्या फलंदाजांनी इंग्लंडच्या गोलंदाजांना अक्षरश: रडवले. पहिल्या सत्रात भारताच्या शेपटाने इंग्लंडच्या गोलंदाजांना चांगलेच झोडपून काढले. पुजारा आणि रहाणे यांच्या भागीदारीला तोडीस तोड ठरेल अशी भागीदारी जसप्रीत बुमराह आणि मोहम्मद शमी यांनी केली. पाचव्या दिवशी पंत आणि इशांत झटपट बाद झाल्यावर शमी-बुमहार जोडीने इंग्लंडच्या गोलंदाजांचा समाचार घेतला. या दोघांनी लंच ब्रेक होईपर्यंत गोलंदाजांची धुलाई केली. त्यामुळेच उपाहाराच्या विश्रांतीला जेव्हा हे दोघे ड्रेसिंग रूममध्ये गेले तेव्हा दोघांचेही दमदार असं स्वागत झालं.

पुजारा-रहाणे या दोघांव्यतिरिक्त एकाही फलंदाजाला फार काळ मैदानावर तग धरता आला नव्हता. पण पाचव्या दिवशी पहिल्या सत्रात मोहम्मद शमीने धडाकेबाज अर्धशतक ठोकले. त्याला जसप्रीत बुमराहने झकास साथ दिली. उपाहाराची वेळ होईपर्यंत या दोघांनी मैदान राखत नाबाद ७७ धावांची भागीदारी केली. शमी नाबाद ५२ तर बुमराह नाबाद ३० धावांवर असताना लंच ब्रेक झाला आणि ते ड्रेसिंग रूमच्या दिशेने निघाले. या दोघांचे अतिशय दिमाखात स्वागत करण्यात आले. कोच रवी शास्त्री, कर्णधार विराट कोहली आणि सर्व सहकारी उभे राहून आणि टाळ्या वाजवून त्यांचे स्वागत करताना दिसले. BCCIने स्वत: हा व्हिडीओ शेअर केला आहे.

दरम्यान, पाचव्या दिवसाचा खेळ ६ बाद १८१ धावांपासून पुढे सुरू झाला. ऋषभ पंत केवळ ८ धावांची भर घालत २२ धावांवर तो माघारी परतला. इशांत शर्मादेखील काही काळ संघर्ष करून १६ धावांवर पायचीत झाला. त्यानंतर इंग्लंडचे गोलंदाज भारताचं शेपूट पटकन गुंडाळणार असं वाटत असतानाच जसप्रीत बुमराह आणि मोहम्मद शमी या दोघांनी धडाकेबाज फलंदाजी केली. बघता बघता त्या दोघांनी अर्धशतकी भागीदारी तर पूर्ण केलीच पण त्यासोबतच मोहम्मद शमीने आपलं अर्धशतकही साजरं केलं. भारताने ८ बाद २९८ धावांवर आपला डाव घोषित केला. बुमराह शमी जोडीने नाबाद ८९ धावांची भागीदारी केली. शमीने नाबाद ५६ तर बुमराहने नाबाद ३४ धावा केल्या.