IND vs ENG video viral: भारत आणि इंग्लंड यांच्यातील एजबॅस्टन कसोटीतील तिसरा दिवसाचा खेळ सुरू आहे. पहिल्या दोन दिवसांत भारतीय संघाने या सामन्यात आपले पूर्णपणे वर्चस्व दाखवले आहे. पाचव्या कसोटीतील तिसऱ्या दिवसाची सुरुवात जोरदार वादाने झाली. इंग्लंडचा जॉनी बेअरस्टो आणि टीम इंडियाचा माजी कर्णधार विराट कोहली यांच्यात मैदानावर वाद झाला. यादरम्यान बेअरस्टोने 11 वे कसोटी शतकही केले, त्याचा डाव विराट कोहलीच्या एका शानदार झेलने संपला. बेअरस्टोला स्लिपमध्ये पकडल्यानंतर विराट कोहलीची सेलिब्रेशन सोशल मीडियावर चांगलीच व्हायरल होत आहे.

बेअरस्टोला शमीच्या 54 व्या षटकातील पहिल्या चेंडूवर ऑफ-साइडमध्ये शॉट खेळायचा होता, पण त्याच्या बॅटची बाहेरची किनार घेत चेंडू पहिल्या स्लिपमध्ये उभ्या असलेल्या विराट कोहलीच्या हातात गेला. कोहलीने हा झेल घेतला आणि बेअरस्टोचा १०६ धावांवर डाव संपवला. बेअरस्टोचा झेल घेतल्यानंतर कोहलीने flying kiss दिला. इंग्लंडच्या डावातील 32 व्या षटकात विराट कोहली आणि जॉनी बेअरस्टो यांच्यात जोरदार वादावाद झाला. विराट कोहली बेअरस्टोला गप्प राहण्याचे संकेत देत असताना बेअरस्टोही गप्प बसला नाही, तो आपली बाजू मांडताना दिसला.