Rajat Patidar News : भारतीय संघाला या महिन्यात इंग्लंडविरुद्ध 5 सामन्यांची कसोटी मालिका खेळायची आहे. शुक्रवारी 12 जानेवारी रोजी निवडकर्त्यांनी पहिल्या दोन कसोटी सामन्यांसाठी भारतीय संघाची घोषणा केली.

इंग्लिश संघाची घोषणा अद्याप झालेली नाही. मात्र संघातील काही खेळाडू सध्या भारतात सामने खेळत आहेत. भारत अ आणि इंग्लंड लायन्स यांच्यात दोन दिवसीय सामना खेळला जात आहे. यामध्ये टीम इंडियाच्या रजत पाटीदारने शानदार शतक झळकावले.

भारत अ आणि इंग्लंड लायन्स यांच्यात खेळल्या जात असलेल्या दोन दिवसीय सामन्यात भारतीय संघाने जबरदस्त कामगिरी केली आहे. पहिल्या दिवसाच्या खेळात गोलंदाजी करताना भारतीय गोलंदाजांनी इंग्लिश संघाला केवळ 233 धावांवर रोखले. यानंतर रजत पाटीदारने आपल्या अर्धशतकाने दमदार सुरुवात केली आणि दिवसाचा खेळ संपेपर्यंत भारतीय संघाने 1 बाद 123 धावा केल्या होत्या.

दुसऱ्या दिवशी रजत पाटीदारने दोन दिवसीय सामन्यात इंग्लिश गोलंदाजांना चांगला घाम फोडला. पहिल्या दिवशी अर्धशतक झळकावणाऱ्या या फलंदाजाने दुसऱ्या दिवसाच्या खेळात सावध फलंदाजी करत शतक झळकावले. या फलंदाजाने 131 चेंडूत 18 चौकार आणि 1 षटकाराच्या मदतीने आपले शतक पूर्ण केले. पण 111 धावांवर तो बाद झाला.

रजतने यापूर्वीही अनेक सामन्यांमध्ये चमकदार कामगिरी केली आहे. मात्र, इंग्लंडविरुद्धच्या कसोटी मालिकेतील पहिल्या दोन सामन्यांसाठी त्याला टीम इंडियात स्थान मिळालेले नाही.

वृत्त लिहिपर्यंत भारत अ संघाने 3 गडी गमावून 224 धावा केल्या होत्या. सरफराजने शानदार फलंदाजी करत 52 चेंडूत 41 धावा केल्या. तर केएस भरत 12 धावा करून खेळत होता. भरतच्या या खेळीत 3 चौकारांचा समावेश होता. त्याला टीम इंडियात स्थान मिळाले आहे. भारत इंग्लंडविरुद्धच्या कसोटी सामन्याच्या प्लेइंग इलेव्हनमध्येही स्थान मिळवू शकते.