India vs England Test Series : इंग्लिश संघ सध्या भारतीय दौऱ्यावर पाच सामन्यांची कसोटी मालिका खेळत आहे. पहिल्या दोन सामन्यांनंतर मालिका सध्या 1-1 अशी बरोबरीत आहे. आता भारत आणि ऑस्ट्रेलिया यांच्यातील मालिकेतील तिसरा सामना राजकोटमध्ये 15 फेब्रुवारीपासून खेळला जाणार आहे.

दुसरा सामना गमावल्यानंतर इंग्लंडचा संघ सरावासाठी अबुधाबीला परतला. मात्र आता तिसऱ्या सामन्यासाठी राजकोटला पोहोचला आहे. मात्र यादरम्यान इंग्लंड संघाचा स्टार फिरकीपटू रेहान अहमदला राजकोट विमानतळावर थांबवण्यात आले. खरंतर, पाकिस्तानी वंशाच्या रेहान अहमदकडे फक्त सिंगल एंट्री व्हिसा होता. या कारणामुळे त्याला विमानतळावर थांबवण्यात आले.

इंग्लंड क्रिकेट बोर्डाने तातडीने व्हिसाची कारवाई केली. यानंतर रेहान अहमदला व्हिसा देण्यात आला आणि त्याला जाण्याची परवानगी देण्यात आली. या मालिकेपूर्वी पाकिस्तानी वंशाच्या शोएब बशीरला व्हिसामुळे अबुधाबीमध्ये राहावे लागले होते. मात्र, काही दिवसांनी त्याला व्हिसा मिळाला आणि त्यानंतर तो भारतात आला. यानंतर तो दुसरी कसोटीही खेळला.

इंग्लंडचा संघ सोमवारी संध्याकाळी साडेपाच वाजता विमानतळावर पोहोचला आणि रात्री आठ वाजता हॉटेलमध्ये पोहोचला. तर इंग्लिश कर्णधार बेन स्टोक्स आणि रेहान अहमद रात्री नऊच्या सुमारास हॉटेलमध्ये पोहोचले. इंग्लंड आणि भारतीय संघ आजपासून (13 फेब्रुवारी) राजकोटमध्ये एकत्र सराव करतील.

तिसऱ्या कसोटी सामन्यापूर्वी इंग्लंडसाठी वाईट बातमी आली आहे. संघाचा स्टार फिरकी गोलंदाज जॅक लीच दुखापतीमुळे संपूर्ण मालिकेतून बाहेर आहे. 32 वर्षीय जॅक लीचला हैदराबाद कसोटी सामन्यादरम्यान डाव्या गुडघ्याला दुखापत झाली, ज्यामुळे तो विझाग (विशाखापट्टणम) येथे झालेल्या दुसऱ्या कसोटीत खेळू शकला नाही.