IND Vs NZ Semi Final World Cup 2023 : एकदिवसीय वर्ल्ड कप 2023 मधील पहिला उपांत्य सामना आज भारत आणि न्यूझीलंड यांच्यात मुंबईतील वानखेडे स्टेडियमवर खेळला जाणार आहे.

वर्ल्ड कपच्या उपांत्य फेरीत दोन्ही संघ आमनेसामने येण्याची ही दुसरी वेळ आहे. याआधी 2019 वर्ल्ड कप स्पर्धेत न्यूझीलंडने भारताचा 18 धावांनी पराभव केला होता. मात्र, या वर्ल्ड कपमध्ये भारताने दोन्ही संघांमधील सामन्यात चार गडी राखून विजय मिळवला.

उपांत्य फेरीचा सामना वानखेडे स्टेडियम मुंबई येथे दुपारी 2:00 वाजता सुरू होईल. याच मैदानावर भारताने या स्पर्धेत श्रीलंकेवर 302 धावांनी शानदार विजय नोंदवला होता.

कशी असेल खेळपट्टी?

मुंबईचे वानखेडे स्टेडियम हे मोठ्या स्कोअरिंग सामन्यांसाठी ओळखले जाते. खेळपट्टी लहान सीमारेषेसह फलंदाजीसाठी योग्य आहे, ज्यामुळे चौकार आणि षटकार सहज मारता येतात. तर गोलंदाजीच्या दृष्टीकोनातून खेळपट्टी फिरकीपटूंना फारशी मदत देत नाही.

मात्र, दुसऱ्या डावात नवीन चेंडू वेगवान गोलंदाजांना खूप मदत करतो. याच कारणामुळे भारताने श्रीलंकेला 55 धावांवर बाद केले होते.

या खेळपट्टीवर पहिल्या डावाची सरासरी 261 धावांची आहे. या खेळपट्टीवर प्रथम फलंदाजी करून एकूण 14 सामने जिंकले असून 13 सामने लक्ष्याचा पाठलाग करताना जिंकले आहेत. वानखेडे स्टेडियमवरील सर्वोच्च धावसंख्या 438/4 आहे, दक्षिण आफ्रिकेने 2015 मध्ये यजमान भारताविरुद्ध केली होती.

कसे असेल हवामान ?

हवामान संकेतस्थळ Accuweather नुसार, मुंबईत सूर्यप्रकाश असेल आणि किमान तापमान 26 अंश सेल्सिअस आणि कमाल तापमान 34 अंश सेल्सिअस राहील. ताशी 14 किलोमीटर वेगाने वारे वाहतील आणि 44 टक्के आर्द्रता असल्याने पावसाचा धोका नाही. मात्र, रात्री दव पडण्याची खात्री आहे. अशा परिस्थितीत, नंतरच्या 10-15 षटकांमध्ये गोलंदाजी करणाऱ्या संघाला अडचणी येऊ शकतात.