Ind Vs Sa Virat Kohli : अखेर तो दिवस आला ज्याची करोडो चाहते वाट पाहत होते. विराट कोहलीने सचिनच्या 49 वनडे शतकांच्या विक्रमाशी बरोबरी केली. वर्ल्ड कप 2023 च्या 37व्या सामन्यात विराट कोहलीने दक्षिण आफ्रिकेविरुद्ध शानदार शतक झळकावले. गेल्या दोन सामन्यांमध्ये विराटचे 49 वे शतक हुकले होते. पण दक्षिण आफ्रिकेविरुद्धच्या सामन्यात या किंग कोहलीने हा टप्पा गाठला.

विराट कोहलीनेही ईडन गार्डन्सवर पहिले एकदिवसीय आणि आंतरराष्ट्रीय शतक झळकावले. आता त्याने याच मैदानावर सचिनच्या शतकाच्या विक्रमाची बरोबरी केली आहे. योगायोगाने विराट कोहलीने त्याच्या वाढदिवशीच सचिनच्या विक्रमाची बरोबरी केली. ड्रेसिंग रूममधून विराटला काय मेसेज आला होता हे पण सांगितलं.

शतक झळकावल्यानंतर विराट कोहली म्हणाला की, ही अशी विकेट होती ज्यावर फलंदाजी करणे कठीण होते. रोहित आणि शुभमनने संघाला चांगली सुरुवात करून दिली. ते चालू ठेवणे हे माझे काम होते. 10 व्या षटकानंतर चेंडू थांबून येत होता. त्यावेळी संघ व्यवस्थापनाने मला संथ खेळायला सांगितले. श्रेयस पण चांगला खेळला. आशिया कपदरम्यान आमच्यात खूप चर्चा झाली होती. कारण आम्ही तिसऱ्या आणि चौथ्या क्रमांकावर फलंदाजी करतो, त्यामुळे खेळाला पुढे नेण्यासाठी ही भागीदारी आवश्यक होती.

कोहली पुढे म्हणाला की, आमच्या संघात हार्दिक नाही, त्यामुळे आम्हाला माहित होते की एक किंवा दोन विकेट्स आम्हाला महागात पडू शकतात. तुमच्या वाढदिवशी या अप्रतिम मैदानावर एवढ्या मोठ्या चाहत्यांसमोर शतक झळकावणं खूप छान आहे. खेळपट्टी संथ आहे, आमच्याकडे दर्जेदार बॉलिंग लाइनअपही आहे, पण आम्हाला मेहनत करावी लागेल.