भारतीय संघ एका मागून एक मालिका सुरु असताना विराट कोहली शतकाची मालिका खंडीत झालीये. बंगळुरुच्या मैदानात पुन्हा तो मोठी खेळी करण्यात अपयशी ठरला. कॅप्टन्सीतून मुक्त झाल्यानंतर विराट कोहली एक फलंदाज म्हणून मैदानात उतरतोय. एक खेळाडू म्हणून मैदानात वावरताना तो आपल्या हटके अंदाजामुळे चर्चेत आलाय. भारत श्रीलंका यांच्यातील सामना सुरु असताना फिल्डिंगवेळी कोहली मॅच पाहण्यासाठी आलेल्या प्रेक्षकांचे मनोरंजन करताना दिसून आले.

मोठी खेळी करण्यात अपयश येत असले तरी कोहलीला त्याची फार चिंता वाटत नाही. मैदानातील त्याच्या हावभाव तर तो आनंद घेत क्रिकेट खेळत असल्याचे स्पष्टपणे दिसून येते. विराट कोहली फिल्डिंगवेळी जसप्रित बुमराहच्या गोलंदाजी शैलीची नक्कल करताना दिसले. यासंदर्भातील व्हिडिओ सोशल मीडियावर व्हायरल होत आहे. यात विराट कोहलीसह संघातील अन्य खेळाडूही दिसते. याआधीही कोहली अन्य गोलंदाजांची कॉपी करताना पाहायला मिळाले आहे .

श्रीलंकेविरुद्धच्या पहिल्या कसोटी सामन्यातील विजयानंतर भारतीय संघ बंगळुरुच्या मैदानात दुसऱ्या कसोटी सामन्यासाठी उतरला आहे. मोहाली कसोटी विराट कोहलीसाठी शंभरावी कसोटी होती. या सामन्यातही त्याला मोठी खेळी करता आली नाही. बंगळुरुमध्ये त्याने संयमी खेळ दाखवला. पण पुन्हा तो मोठी खेळी करण्यात अपयशी ठरला. त्याच्या 71 व्या शतकाची प्रतिक्षा आणखी वाढली आहे. मोठी खेळी करण्यात यश येत नसले तरी विराटने याचा कोणताही दबाव घेतलेला नाही. मैदानातील त्याची कृती हेच सांगणारी आहे.