India vs West Indies 2nd ODI : कॅरेबियन संघाने दुसऱ्या एकदिवसीय सामन्यात भारताचा 6 गडी राखून पराभव केला. या सामन्यात नियमित कर्णधार रोहित शर्माला विश्रांती देण्यात आली होती, त्यामुळे हार्दिक पांड्याला कर्णधारपदाची संधी मिळाली. मात्र या सामन्यात टीम इंडियाला विजय मिळवून देण्यात तो अपयशी ठरला.

संघाच्या फलंदाजी निराशाजनक कामगिरी आणि गोलंदाजीतही शार्दुल ठाकूरशिवाय कोणीही आपली छाप सोडू शकले नाही. संघाच्या या दारुण पराभवानंतर हार्दिक पांड्याने सामना हरण्याचे मोठे कारण सांगितले आहे.

दुसऱ्या एकदिवसीय सामन्यातील पराभवानंतर कर्णधार हार्दिक पांड्याने फलंदाजांवर क्लास लावला अन् म्हणाला की, आज विकेट चांगली होती, पहिल्या सामन्यासारखी नव्हती, पण आमच्या फलंदाजांनी खराब शॉट्स खेळले आणि विकेट गमावल्या. शार्दुलने शानदार गोलंदाजी केली आणि त्याने आमच्या आशा जिवंत ठेवल्या. निराश झालो, पण बरेच काही शिकायला मिळाले. किशनने ज्या पद्धतीने फलंदाजी केली, ते भारतीय क्रिकेटसाठी महत्त्वाचे आहे.

एकदिवसीय विश्वचषकाच्या तयारीबाबत बोलताना हार्दिक पांड्या म्हणाला, 'मी वनडे विश्वचषकाची तयारी करत आहे, त्यामुळे आणखी काही षटके करत आहे. हळूहळू मी पूर्ण बॉलिंग फिटनेसकडे वाटचाल करत आहे. यावेळी मी ससा नसून कासव झालो आहे. मालिका 1-1 1 अशी बरोबरीत राहिली असून आता शेवटचा सामना निर्णायक ठरणार आहे. पुढचा सामना चाहत्यांसाठी तसेच खेळाडूंसाठी रोमांचक असेल.

सामन्या बद्दल बोलायचं झालं तर, दुसऱ्या एकदिवसीय सामन्यात वेस्ट इंडिजने भारतावर सहा गडी राखून विजय मिळवला. यासह कॅरेबियन संघाने मालिकेत 1-1 अशी बरोबरी साधली आहे. या सामन्यात प्रथम फलंदाजी करताना भारताने 40.5 षटकात 181 धावा केल्या. भारताकडून सर्वाधिक 55 धावा इशान किशनच्या बॅटतुन आल्या. त्याचवेळी वेस्ट इंडिजकडून रोमॅरियो शेफर्ड आणि गुडाकेश मोती यांनी प्रत्येकी तीन बळी घेतले.

वेस्ट इंडिजने 182 धावांचे लक्ष्य 36.4 षटकांत चार गडी गमावून पूर्ण केले. शाई होपने कर्णधारपदाची खेळी खेळली आणि नाबाद 63 धावा केल्या. त्याचवेळी केसी कार्टी 48 धावा करून नाबाद राहिला. भारताकडून शार्दुलने तीन बळी घेतले. या मालिकेतील तिसरा आणि निर्णायक सामना मंगळवारी त्रिनिदादमध्ये होणार आहे.