दुबई : अवघ्या क्रिकेटविश्वाचे लक्ष लागलेला भारत-पाकिस्तान महामुकाबला उद्या (ता. २४) दुबईच्या स्टेडियमवर होत आहे. सर्व प्रकारच्या क्रिकेट विश्वकरंडक स्पर्धेत पाकिस्तानविरुद्धचे सर्व सामने जिंकणारा भारत ही परंपरा कायम राखण्यासाठी लढणार आहे; तर सातत्याने पराभवाचे तोंड पाहावे लागलेला पाकिस्तान नवी सुरुवात करण्यासाठी मैदानात उतरणार आहे.एकदिवसीय आणि ट्वेन्टी-२० या दोन्ही विश्वकरंडक स्पर्धांत मिळून भारताने पाकिस्तानवर १२-० (यातील एक सामना टाय, पण तोही भारताने बॉलआउटमध्ये जिंकलेला) अशी मक्तेदारी गाजवलेली आहे.

यजमान असलेला भारत पाकिस्तानविरुद्धच्या या सामन्यातून विश्वकरंडक स्पर्धेची मोहीम सुरू करणार आहे. त्यामुळे सर्वार्थाने हा सामना महत्त्वाचा आहे. नुकत्याच झालेल्या आयपीएलमध्ये खेळण्याचा अनुभव आणि सराव सामन्यातील शानदार कामगिरी ही मोठी ताकद भारतीयांकडे आहे; तर पाकिस्तानचा एका सराव सामन्यात पराभव झालेला आहे.एकूणच भारताचे पारडे जड असले तरी सावध राहावे लागणार आहे. भारतीयांसाठी पाकिस्तानच्या काही खेळाडूंचा अपवाद वगळता इतर खेळाडू नवखे आहेत, त्यामुळे ‘नजर हटी दुर्घटना घटी’ हे टाळण्यासाठी भारतीयांना दक्ष राहावे लागणार आहे.

थेट प्रक्षेपण स्टार स्पोर्टस्

वेळ - आज सायंकाळी- ७.३० पासून

भारत-पाकिस्तान आमने-सामने

ट्वेन्टी-२० विश्वकरंडक स्पर्धेत एकूण पाच लढती

पाचही लढतीत भारताचा विजय

एक लढत टाय होती, पण बॉलऑउटमध्ये भारताचा विजय

दोन्ही संघांत ट्वेन्टी-२० चे एकूण आठ सामने, त्यात सात लढतीत भारताचा विजय

सातपैकी तीन सामन्यांत प्रथम फलंदाजी करताना आणि चार सामन्यांत धावांचा पाठलाग करताना भारताचा विजय

पाकिस्तानचा एकमेव विजय बंगळूरमध्ये २०१२ मधील सामन्यात झाला होता

दुबईच्या स्टेडियमवर प्रथमच एकमेकांविरुद्ध खेळणार