CWG 2022 : उंच उडीत भारताच्या तेजस्विन शंकरला (Tejaswin Shankar) कांस्य पदक (Bronze Medal) पटकावले. त्याने 2.22 मिटर उंच उडी मारत कांस्य पदकाला गवसणी घातली. उंची उडीत राष्ट्रकुल पदक जिंकणारा तो पहिला भारतीय ठरला आहे. भारताने यंदाच्या राष्ट्रकुल स्पर्धेत जिंकलेले हे पहिले ट्रॅक अँड फिल्डमधील पदक आहे. तेजस्विनने पहिल्या प्रयत्नात 2.10 मिटर उंच उडी मारली. त्यानंतर त्याने 2.15 मीटर उंच उंडी पहिल्याच प्रयत्नात यशस्वी करून दाखवली. विशेष म्हणजे शंकरला अखेरच्या क्षणी संघात स्थान मिळाले होते. तेही दिल्ली उच्च न्यायायलाच्या आदेशामुळे! शंकरची या हंगामातील सर्वोत्तम उंच उडी ही 2.27 मीटर इतकी होती. तर त्याची वैयक्तिक सर्वोत्तम कामगिरी ही 2.29 मीटर इतकी आहे.

शंकरने तिसऱ्यावेळी 2.19 मीटर उंच उडी मारण्याचा पहिला प्रयत्न केला. तो पहिल्या प्रयत्नातच 2.19 मीटर उंच उंडी मारण्यात यशस्वी ठरला. त्यामुळे तो पदकांच्या शर्यतीत पहिल्या क्रमांकावर होता. त्यानंतर त्याने 2.22 मीटर उंच उडी मारत आपले आव्हान कायम ठेवले. दुसऱ्या बाजूने न्यूझीलंडचा हामिश केर आणि ऑस्ट्रेलियाचा ब्रँडन स्टार्क यांनी देखील दमदार उंची उडी मारत पदकांच्या शर्यतीत आघाडी मिळवली.

केर आणि स्टार्क यांनी 2.25 मीटर उंच उडी मारत सुवर्ण पदकाच्या शर्यतीत आघाडी घेतली. मात्र तेजस्विन शंकरला 2.25 मीटर उडी मारण्यात यश आले नाही. त्याने दोन वेळा 2.25 मीटर उंच उडी मारण्याचा प्रयत्न केला मात्र त्याचा प्रयत्न फसला. अखेर शंकरने 2.28 मीटर उंच उडी मारण्याचा शेवटचा प्रयत्नही करून सुवर्ण पदक मिळवण्याचा प्रयत्न केला. मात्र तो अयशस्वी ठरला.