WI vs IND Test Squad : भारत येत्या 12 जुलैपासून वेस्ट इंडीज दौऱ्यावर जाणार आहे. या दौऱ्यावर भारतीय संघ दोन कसोटी सामन्यांची मालिका खेळणार आहे. यासाठी भारतीय संघाची घोषणा झाली असून भारतीय संघातून चेतेश्वर पुजाराला डच्चू मिळाला आहे. संघात यशस्वी जैसवाल, ऋतुराज गायकवाड मुकेश कुमार आणि नवदीप सैनी यांना संधी मिळाली आहे.

भारताने WTC Final हरल्यानंतर कसोटी संघाचा आता चेहरा बदलण्याची गरज असल्याची चर्चा सुरू झाली. भारतीय संघाचा कर्णधार रोहित शर्माला विंडीज दौऱ्यावर विश्रांती देण्यात येईल आणि नवा कसोटी संघ उतरवला जाईल अशीही चर्चा होती. मात्र रोहित शर्मा फिट असून तो कसोटी खेळणार असल्याचे संघ जाहीर झाल्यावर सिद्ध झाले.

जरी रोहित शर्माच्या कसोटी संघातील स्थान अजून काही काळ तरी कायम राहील हे पक्के झाले असले तरी संघातील अजून एक वरिष्ठ खेळाडू चेतेश्वर पुजाराला WTC Final मधील सामन्यातील सुमार कामगिरीनंतर संघातून डच्चू मिळाला आहे.

भारताच्या या कसोटी संघात ऋतुराज गायकवाड, यशस्वी जैसवाल या दोन आयपीएलमध्ये चांगली कामगिरी करणाऱ्या खेळाडूंना संधी देण्यात आली आहे. याचबरोबर गोलंदाजी विभागात नवदीप सैनी आणि मुकेश कुमार यांना कसोटी संघात स्थान मिळाले.

वेस्ट इंडीज दौऱ्यावरील भारताचा कसोटी संघ :

रोहित शर्मा, शुभमन गिल, ऋतुराज गायकवाड, विराट कोहली, यशस्वी जैसवाल, अजिंक्य रहाणे, केएस भरत, इशान किशन, आर. अश्विन, रविंद्र जडेजा, शार्दुल ठाकूर, अक्षर पटेल, मोहम्मद सिराज, मुकेश कुमार, जयदेव उनाडकट, नवदीप सैनी.

(Sports Latest News)