दोहा- भारतीय फुटबॉल संघाचा कर्णधार सुनील छेत्रीच्या दोन गोलच्या जोरावर भारताने बांगलादेशविरोधात 2-0 ने विजय मिळवला. फुटबॉल वर्ल्ड कप आणि आशियाई चषक क्वालिफायर्सच्या ई ग्रुपच्या दुसऱ्या फेरीत बांगलादेशला पराभूत करून स्पर्धेतील पहिला विजय नोंदवला. भारत 2022 च्या वर्ल्ड कप स्पर्धेतून आधीच बाहेर पडला असला तरी कर्णधार सुनिल छेत्रीने मात्र कमाल केली आहे. बांगलादेशविरुद्धच्या सामन्यात छेत्रीने दोन गोल करताना अर्जेंटिनाचा दिग्गज फुटबॉलपटू लिओनेल मेस्सीला मागे टाकलं आहे.

छेत्रीने 79 व्या मिनिटाला गोल करून संघाचं खातं उघडलं. त्यानंतर शेवटच्या काही मिनिटात आणखी एक गोल करून ग्रुप ई मधील या सामन्यात विजय निश्चित केला. या गोलसह सुनिल छेत्रीने आंतरराष्ट्रीय सामन्यांमध्ये स्वत:च्या नावावर 74 गोल नोंदवले. आंतरराष्ट्रीय फुटबॉलमध्ये सध्या खेळत असलेल्या खेळाडूंमध्ये पोर्तुगालचा ख्रिस्तियानो रोनाल्डोचे सर्वाधिक 103 गोल आहेत. त्याच्यानंतर दुसऱ्या स्थानी आता सुनिल छेत्री आहे.

फुटबॉलमध्ये आतापर्यंत सर्वाधिक गोल करणाऱ्या खेळाडूंच्या यादीत तो 11 व्या स्थानी आहे. त्याच्या पुढे 10 नंबरवर तीन खेळाडू आहेत. हंगेरीच्या सेंडर कोक्सिस, जपानचा कुनिशिगे कामटो आणि कुवैतच्या बशर अब्दुल्ला यांचे प्रत्येकी 75 गोल झाले आहेत. सुनिल छेत्रीनंतर युएईच्या अलीचा (73 गोल) नंबर लागतो तर मेस्सीचे 72 गोल झाले आहेत.

भारताने याआधी तीन जूनला आशियाई चॅम्पियन कतारविरोधात सामना खेळला होता. त्यामध्ये भारताला पराभवाचा सामना करावा लागला. त्यानंतर बांगलादेशविरुद्धच्या सामन्यात कमबॅक केलं. भारताचाा पुढचा सामना आता अफगाणिस्तानशी असणार आहे. बांगलादेशनं शेवटच्या मिनिटापर्यंत सामना बरोबरीत सोडवण्यासाठी प्रयत्न केला.