India vs New Zealand, 2nd Test Day 1 : भारत आणि न्यूझीलंड यांच्यातील दुसरा कसोटी सामना मुंबईतील वानखेडेच्या स्टेडियमवर खेळवण्यात येत आहे. नाणेफेक जिंकून प्रथम फलंदाजी करणाऱ्या भारतीय संघाच्या सलामी जोडीने चांगली सुरुवात केली. पण शुबमन गिल परतल्यानंतर अजाझ पटेलने एकाच षटकात चेतेश्वर पुजारा आणि विराट कोहलीला तंबूत धाडले. 30 व्या षटकात दोघेही तंबूत परतले. पुजारा 5 चेंडू खेळूनही खाते उघडू शकला नाही. दुसरीकडे विराट कोहलीही 4 चेंडूचा सामना करुन शून्यावर बाद झाला.

चेतेश्वर पुजारा पहिल्या कसोटी सामन्यातही नावाला साजेसा खेळ करु शकला नव्हता. दुसरीकडे विराट कोहली विश्रांतीनंतर मुंबई कसोटी सामन्यातून कमबॅक करत आहे. विराट कोहलीनं टॉस जिंकून पहिल्यांदा बॅटिंग करण्याचा निर्णय घेतला. आपल्या कर्णधाराचा विश्वास सलामी जोडीनं बऱ्यापैकी सार्थ ठरवला. मयंक आणि शुबमनने पहिल्या विकेटसाठी 80 धावांची भागीदारी केली. ही जोडी अजाझ पटेलनं फोडली. शुबमनला त्याने 44 धावांवर माघारी धाडले.

त्याची जागा घेण्यासाठी मैदानात उतरलेला पुजाराही त्याच्यासमोर गडबडला. ही गोष्ट कमी होती की काय म्हणून कर्णधारही एकाही धावेची भर न घालता माघारी फिरला. पहिल्या तिन्ही फंलदाजाना बाद करुन पहिल्या दिवशी अजाझ पटेलने हिरोगिरी दाखवून दिलीये. कोहली दमदार कमबॅक करेल अशी आशा होती. मात्र त्याची सुरुवात शून्यातून झाल्याचे दिसते.