देशाच्या राजधानीत सध्या कडाक्याची थंडी असली तरी भारतीय डेव्हिस करंडक संघाने पाकिस्तानमध्ये ग्रास कोर्टवर होणाऱ्या लढतीसाठी सराव सुरु केला आहे. ही लढत इस्लामाबादमध्ये तीन आणि चार फेब्रुवारी रोजी होत आहे.

भारताचा सध्याचा सर्वात चांगले रँकिंग असलेला खेळाडू सुमीत नागल (१३७) आणि शशिकुमार मुकुंद (४६३) यांनी माघार घेतली आहे त्यामुळे सध्या भारताकडे रामकुमार रामनाथन हाच एकमेव एकेरीतील खेळाडू आहे, दुसऱ्या खेळाडूचा शोध सुरु आहे. युकी भांब्री किंवा एन. श्रीराम बालाजी यातून एकाची निवड कर्णधार रोहित राजपाल यांना करायची आहे. निकी पूनाछा हा सुद्धा एकेरीसाठी पर्याय आहे.

भांब्री हा खरे तर दुहेरीतील खेळाडू आहे. त्याचे दुहेरीतील एटीपी मानांकन ६१ आहे. दुहेरीतील अनुभवी आणि निष्णांत खेळाडू रोहन बोपण्णा निवृत्त झाल्यामुळे पाकविरुद्ध भांब्री दुहेरीत खेळणार हे निश्चित आहे. भांब्री आणि बालाजी ऑस्ट्रेलियन ओपनमध्ये खेळत होते पराभवानंतर ते मेलबर्नहून थेट दिल्लीत दाखल झाले, त्यामुळे त्यांनी आज सराव केला नाही. मात्र रामकुमार, पोनाछा आणि साकेत मिर्नेयी यांनी आज अडीच तास सराव केला. या सरावात राष्ट्रीय टेनिस सेंटरमधील उदित कंबोज आणि मान केसर्वानी यांनी त्यांना सहाय्य केले.

भांब्री आणि बालाजी नुतकेच ऑस्ट्रेलियन ओपन खेळून आल्यामुळे त्यांनी आता केवळ हलका वॉर्मअप करावा. ग्रास कोर्टसाठी वेगळ्या प्रकारची चपळता आणि पदलालित्य आवश्यक असते. नेटजवळ जाण्याची चपळाई करावी लागते, असा वॉर्मअप भांब्री आणि बालाजीकडून आम्ही सध्या करुन घेणार आहोत, असे राजपाल यांनी सांगितले. दुहेरीतील दुसरा खेळाडू कोण असेल याचा निर्णय एक दोन दिवसांत घेतला जाईल. पर्याय असलेल्या खेळाडूंचा ग्रास कोर्टवर खेळ कसा होतो हे पाहिल्यानंतर आम्ही निर्णय घेऊ, असे सांगून राजपाल पुढे म्हणाले, पाकिस्तानने त्यांच्या घरच्या ग्रास कोर्टवर काही चांगल्या संघांना पराभूत केले आहे त्यामुळे आम्हाला अधिक चांगली तयारी करावी लागेल. ग्रास कोर्टवर नेजवळ कसा खेळ करायचा हे त्यांना माहित आहे त्यामुळे आम्हीही तशीच तयारी करणार आहोत.

ग्रास कोर्टशी मिळते जुळते घेणे सोपे नसते. चेंडू खाली रहातो, परंतु अधिक वेगात येतो त्याचा वेग कधी कधी अनपेक्षित असतो, काही चेंडूंची उसळीही अधिक असते, असे प्रशिक्षक आणि माजी खेळाडू झीशान अली यांनी सांगितले.