India Vs Pakistan T20 World Cup 2022 : ऑस्ट्रेलियात होणाऱ्या टी 20 वर्डकपमध्ये येत्या 23 ऑक्टोबरला भारत आणि पाकिस्तान यांच्यात हाय व्होल्टेज लढत होणार आहे. दोन्ही कट्टर प्रतिस्पर्धी संघ वर्ल्डकपची मोहिम याच सामन्याने सुरू करणार आहेत. मेलबर्न क्रिकेट ग्राऊंडवर होणाऱ्या या सामन्यात जवळपास एक लाख प्रेक्षक उपस्थित राहतील असा अंदाज वर्तवण्यात आला आहे. दरम्यान, सुपर 12 च्या यासामन्यापूर्वी भारताचा आक्रमक फलंदाज ऋषभ पंतने पाकिस्तानचा वेगवान गोलंदाज हसन अलीबाबतचा एक किस्सा सांगितला.

रोहित शर्माच्या नेतृत्वातील भारतीय संघ आपली वर्ल्डकपची सुरूवात ही विजयाने करण्यास उत्सुक असणार आहे. 2021 मध्ये युएईत झालेल्या गेल्या टी 20 वर्ल्डकप सामन्यात पाकिस्तानने भारताला 10 विकेट्सनी पराभूत केले होते. याबबत पंत म्हणाला, 'पाकिस्तानविरूद्ध खेळणे कायम खास असते. या सामन्याबाबत चाहत्यांमध्ये एक वेगळा उत्साह असतो. या सामन्यात फक्त आमच्याच नाही तर चाहत्यांसह अनेकांच्या भावना गुंतलेल्या असतात.'

ऋषभ पंत पुढे म्हणाला, 'हा एक वेगळ्या प्रकारची अनुभव असते. एक वेगळेच वातावरण असते. ज्यावेळी तुम्ही मैदानावर जाता त्यावेळी सगळ्या दिशेने लोक तुम्हाला चिअर करतानाचा आवाज येत असतो. हा एक वेगळाच अनुभव असतो. ज्यावेळी आपण आपले राष्ट्रगीत गात असतो त्यावेळी तर हा सळसळता उत्साह टिपेला पोहचलेला असतो.'

गेल्या वर्षी दुबईत खेळल्या गेलेल्या टी 20 वर्ल्डकपमधील भारत पाकिस्तान सामन्यातील एका प्रसंगाची पंतने आठवण सांगितली. पंत म्हणाला की, 'मला आठवते की मी त्या सामन्यात हसलन अलीला एकाच षटकात दोन षटकार मारले होते. आम्हाला धावगती वाढवण्याची गरज होती कारण आम्ही स्वस्तात आमच्या विकेट गमावल्या होत्या. मी आणि विराट कोहलीने भागीदारी रचली होती. आम्ही धावगती वाढवण्याचा प्रयत्न करत होतो. त्यावेळी मी एका हाताने दोन षटकार मारले होते.' ऋषभ पंतला मेलबर्नवर होणाऱ्या सामन्यात संधी मिळते की नाही हे पाहणे उत्सुकतेचे ठरणार आहे.