India Vs South Africa 2nd T20I : भारताने दक्षिण आफ्रिकेविरूद्धचा पहिला टी 20 सामना जिंकून मालिकेत 1-0 अशी आघाडी घेतली आहे. आता गुवाहाटीत होणाऱ्या दुसऱ्या टी 20 सामन्यात विजय मिळवून मालिका खिशात घालण्याच्या इराद्यात भारतीय संघ असेल. मात्र या सामन्यात पाऊस देखील हजेरी लावू शकतो. त्यामुळे कोरोना महामारी सुरू झाल्यापासून एकही आंतरराष्ट्रीय सामना न झालेल्या गुवाहाटीत क्रिकेट चाहत्यांमध्ये चलबिचल सुरू झाली आहे. गुवाहाटीच्या स्टेडियमवर झालेला शेवटचा आंतरराष्ट्रीय सामना देखील पावसामुळे रद्द करावा लागला होता. (Guwahati Weather forecast Rain)

गुवाहाटीतील स्थानिक हवामान विभागाने वर्तवलेल्या अंदाजानुसार रविवारी ढगाळ वातावरण असणार आहे. याचबोरबर पावसाच्या मोठ्या दोन सरी किंवा थंडरशॉवर देखील होण्याची शक्यता आहे. दरम्यान, आयोजकांनी सांगितले की त्यांनी जर पाऊस झाला तर त्यानंतर मैदान खेळण्यायोग्य करण्यासाठी सर्व तरतूद करून ठेवण्यात आली आहे.

आसाम क्रिकेट असोसिएशनने दोन अत्यंत हलके दोन पिच कव्हर्स अमेरिकेतून आयात केले आहेत. मैदानात आधीपासूनच 20 कव्हर्स उपलब्ध आहेत. आसाम क्रिकेट असोसिएशनचे सचिव देवाजीत सिक्का यांना सांगितले की, 'हे आयात केलेले कव्हर्स पिचवर पाणी किंवा दव पडू देत नाहीत.'

गुवाहाटी स्टेडियममध्ये 39 हजार प्रेक्षक सामावून घेण्याची क्षमता आहे. सामन्यादिवशी दुर्गा पूजा आणि गांधी जयंती आहे. त्यामुळे मोठ्या संख्येने प्रेक्षक स्टेडियमकडे येण्याची शक्याता आहे. या गर्दीचे व्यवस्थापन करण्यासाठी देखील उपाययोजना तयार करून ठेवल्या आहेत. आज सकाळी क्रिकेटर अक्षर पटेल आणि उमेश यादव यांनी प्रसिद्ध कामाख्या देवीचे दर्शन घेतले होते. त्यावेळी त्यांना या शक्तीपीठापर्यंत घेऊन जाण्यासाठी मोठा फौजफाटा देण्यात आला होता.