विशाखापट्टणम : सलग दोन पराभव झालेल्या भारताने तिसऱ्या टी 20 सामन्यात दक्षिण आफ्रिकेचा 48 धावांनी पराभव करत विजयाचे खाते उघडले. याचबरोबर आफ्रिकेचा मालिकेवर कब्जा करण्याचा मनसुबा देखील हाणून पाडला. भारताचे 180 धावांचे आव्हान पार करण्यासाठी मैदानात उतरलेल्या आफ्रिकेला 131 धावांपर्यंतच मजल मारता आली. भारताकडून हर्षल पटेल 4 तर युझवेंद्र चहलने 3 विकेट घेतल्या. फलंदाजीत सलामीवीर ऋतुराज गायकवाडने 57 तर इशान किशनने 54 धावांची अर्धशतकी खेळी केली.

युझवेंद्र चहलने 29 धावा करणाऱ्या क्लासनला बाद करत आफ्रिकेला सहावा आणि मोठा धक्का दिला.

हर्षल पटेलने फॉर्ममध्ये असलेल्या डेव्हिड मिलरला 3 धावांवर बाद करत आफ्रिकेला पाचवा धक्का दिला.

भारताचे 180 धावांचे आव्हान घेऊन मैदानात उतरलेल्या दक्षिण आफ्रिकेला हर्षल पटेल, अक्षर पटेल आणि युझवेंद्र चहलने धक्के दिले. पहिल्या 10 षटकात आफ्रिकेची अवस्था 4 बाद 60 धावा अशी झाली. चहलने दोन विकेट घेतल्या.

हार्दिक पांड्याने शेवटच्या दोन षटकात फटकेबाजी करत 21 चेंडूत 31 धावा केल्या. यामुळे भारताने 20 षटकात 5 बाद 179 धावांपर्यंत मजल मारली.

प्रेटोरियसने पंतला आणि कसिगो रबाडाने दिनेश कार्तिकला बाद करत भारताला दोन धक्के दिले.

प्रेटोरियसने 35 चेंडूत 54 धावा करणाऱ्या इशान किशनला बाद करत भारताला तिसरा धक्का दिला.

तबरेज शमसीने श्रेयस अय्यरला 14 धावांंवर बाद करत भारताला दुसरा धक्का दिला.

ऋतुराज गायकवाड बाद झाल्यानंतर इशान किशनने आक्रमक फलंदाजी करत 31 चेंडूत अर्धशतक झळकावले. याचबरोबर भारताने 11 व्या षटकात शतकी मजल मारली.

आक्रमक फलंदाजी करत अर्धशतकी खेळी करणारा ऋतुराज गायकवाड 35 चेंडूत 57 धावा करून केशव महाराजच्या गोलंदाजीवर त्याच्याकडे झेल देत बाद झाला.

दक्षिण आफ्रिकेविरूद्धच्या पहिल्या दोन सामन्यात शांत असणारी ऋतुराज गायकवाडची बॅट अखेर तिसऱ्या आणि महत्वाच्या सामन्यात तळपली. त्याने अर्धशतकी खेळी करत संघाला 10 व्या षटकात 95 धावांपर्यंत मजल मारून दिली.

प्रथम फलंदाजी करण्यासाठी उतरलेल्या भारतीय संघाने दमदार सुरूवात केली. सलामीवीर ऋतुराज गायकवाड आणि इशान किशन यांनी सहाव्या षटकातच संघाचे अर्धशतक धावफलकावर लावले. यात आक्रमक फलंदाजी करणाऱ्या ऋतुराजने मोठा वाटा उचलला

तिसऱ्या आणि मालिका वाचवण्यासाठी महत्वाच्या असणाऱ्या टी 20 सामन्यात भारताचा कर्णधार ऋषभ पंतने पुन्हा एकदा नाणेफेक गमावली आहे. टेम्बा बावुमाने नाणेफेक जिंकून प्रथम गोलंदाजी करण्याचा निर्णय घेतला आहे.

भारतीय संघाचे नेतृत्व करणाऱ्या ऋषभ पंतचे आजच्या तिसऱ्या सामन्यात सर्वस्व पणाला लागले आहे. आजचा सामना जर भारताने गमावला तर दक्षिण आफ्रिकेविरूद्धची टी 20 मालिका देखील गमवावी लागणार आहे.