India Women vs South Africa Women : भारत आणि दक्षिण आफ्रिका यांच्यातील महिलांचा त्रिकोणी टी-20 आंतरराष्ट्रीय क्रिकेट सामना शनिवारी पावसामुळे रद्द करावा लागला. हे दोन्ही संघ गुरुवारच्या अंतिम फेरीसाठी आधीच पात्र ठरले आहेत आणि त्यामुळे येथील सामना विजेतेपदाच्या लढतीपूर्वी 'ड्रेस रिहर्सल'सारखा होता. या सामन्यात पावसामुळे केवळ दोनच षटकांचा खेळ झाला, ज्यामध्ये भारताने बिनबाद चार धावा केल्या.

जेमिमा रोड्रिग्सने मलाबाच्या चेंडूवर चौकार मारून भारताचे खाते उघडले. दुस-या टोकाला स्मृती मानधना खाते उघडू शकली नव्हती. पहिल्या तीन सामन्यांतून बाहेर राहिल्यानंतर या सामन्यात शबनिमचे पुनरागमन झाले. भारताची अष्टपैलू खेळाडू पूजा वस्त्राकरनेही सप्टेंबरनंतरच्या या सामन्यात पुनरागमन केले, मात्र पावसामुळे तिला मैदानातही उतरता आले नाही.

भारतीय कर्णधार हरमनप्रीत कौरने नाणेफेक जिंकून प्रथम फलंदाजी करण्याचा निर्णय घेतला आणि वस्त्राकरला प्लेइंग इलेव्हनमध्ये स्थान देण्यात आले. भारत तीन सामन्यांनंतर अपराजित आहे. सोमवारी त्यांचा गट टप्प्यातील शेवटचा सामना वेस्ट इंडिजशी होणार आहे. वेस्ट इंडिजने आतापर्यंतचे तिन्ही सामने गमावले आहेत.