भारत आणि पाकिस्तान (India vs Pakistan) यांच्यातील महिला वर्ल्डकप (ICC Women's World Cup 2022) सामन्यात भारताने पाकिस्तानसमोर 245 धावांचे आव्हान ठेवले होते. मात्र या आव्हानाचा पाठलाग करताना पाकिस्तान महिला क्रिकेट (Pakistan Women Cricket Team) संघाची दमछाक झाली. पाकिस्तानचा सर्व संघ 137 धावात पॅव्हेलियनमध्ये परतला. भारताने 107 धावांनी मोठा विजय साजरा केला. भारतीय महिला क्रिकेट संघाने पाकिस्तान महिला क्रिकेट संघाविरूद्धचे आपले 100 टक्के विनिंग पर्सेंटेज कायम राखले. भारताची डावखुरी फिरकी गोलंदाज राजेश्वरी गायकवाडने (Rajeshwari Gayakwad) पाकिस्तानच्या फलंदाजांना आपल्या फिरकीच्या रणनीतीत चांगलेच अडकवले. तिने 31 धावात 4 बळी घेत पाकिस्तानच्या फलंदाजीला खिंडार पाडले.

भारताने नाणेफेक जिंकून प्रथम फलंदाजी करत 50 षटकात 7 बाद 244 धावा उभारल्या. भारताकडून पूजा वस्त्रकारने (Pooja Vastrakar) धडाकेबाज फलंदाजी करत 67 धावांची खेळी केली. तिला स्नेह राणाने (Sneh Rana) 53 धावांची अर्धशतकी खेळी करून चांगली साथ दिली. विशेष म्हणजे चांगल्या सुरूवातीनंतर भारताची मधील फळी ढेपाळली होती. त्यानंतर या दोघींनी सातव्या विकेटसाठी 122 धावांची भागीदारी रचली होती. सलामीवीर स्मृती मानधनाने (Smriti Mandhana) देखील 52 धावांची अर्धशतकी खेळी केली. तिने दिप्ती शर्मासोबत दुसऱ्या विकेटसाठी 92 धावांची भागीदारी रचली. यानंतर मात्र पाकच्या गोलंदाजांनी भारताची अवस्था 1 बाद 92 धावांवरून 6 बाद 114 धावा अशी केली होती.

भारताने ठेवलेल्या 245 धावांच्या आव्हानाचा पाठलाग करताना पाकिस्तानची सुरूवात खराब झाली. त्यांचा निम्मा संघ अवघ्या 70 धावात माघारी फिरला होता. त्यानंतर त्यांनी रडत खडत शतकी मजल मारली. तळातील फलंदाज बेगने 24 धावांची खेळी केली. त्यामुळे पाकिस्तान 137 धावांपर्यंत मजल मारू शकला.