चेंगडू (चीन) - भारतीय पुरुष संघाला थॉमस करंडक या प्रतिष्ठेच्या बॅडमिंटन स्पर्धेमधील 'क' गटातील अखेरच्या साखळी फेरीच्या लढतीत पराभव पत्करावा लागला. इंडोनेशियाने भारतीय संघावर ४-१ असा विजय मिळवला. या विजयामुळे क गटामध्ये इंडोनेशियाने पहिल्या स्थानावर झेप घेतली. भारतीय संघ दुसऱ्या स्थानावर राहिला.

इंडोनेशिया व भारत या दोन देशांनी क गटामधून बाद फेरीत प्रवेश केला होता. या गटातील थायलंड व इंग्लंड या दोन देशांचे आव्हान साखळीतच संपुष्टात आले होते. त्यामुळे या गटातील अखेरच्या साखळी फेरीच्या लढतीत पहिल्या व दुसऱ्या स्थानासाठी चुरस होती. इंडोनेशिया - भारत यांच्यामधील लढतीतील विजेता पहिल्या क्रमांकाचा मानकरी ठरणार होता. त्यामुळे या लढतीच्या निकालावर विशेष लक्ष होते.

भारताच्या एच. एस. प्रणोय याने अँथोनी गिनटिंग याचा कडवा संघर्ष १३-२१, २१-१२, २१-१२ असा तीन गेममध्ये मोडून काढला. प्रणोय याने ही लढत एक तास व एक मिनिटात जिंकली व भारताला १-० अशी आघाडी मिळवून दिली. त्यानंतर मात्र भारतीय खेळाडूंना इंडोनेशियाच्या खेळाडूंचे आव्हान परतवून लावता आले नाही.

सात्विक साईराज रंकीरेड्डी - चिराग शेट्टी या दुहेरीतील जोडीकडून मोठ्या अपेक्षा होत्या. पण मुहम्मद फिकरी - बगार मौलाना या जोडीने सात्विक - चिराग या भारतीय जोडीवर २४-२२, २२-२४, २१-१९ अशी तीन गेममध्ये मात केली. भारतीय जोडीचा एक तास व सतरा मिनिटांमध्ये पराभव झाला.

महत्त्वाच्या लढतीत लक्ष्यची हार

इंडोनेशियाने १-१ अशी बरोबरी केल्यानंतर लक्ष्य सेनवर भारताची मदार होती. परतीच्या एकेरीच्या लढतीत त्याच्याकडून भारताला विजय हवा होता. पण जॉनाथन ख्रिस्तीने लक्ष्यवर २१-१८, १६-२१, २१-१७ अशी मात केली. लक्ष्यला एक तास व पंधरा मिनिटांत हार पत्करावी लागली. इंडोनेशियाने २-१ अशी आघाडी मिळवली. ध्रुव कपिला - साई प्रतीक या जोडीला दुहेरीच्या लढतीत निराशेचा सामना करावा लागला. त्यामुळे इंडोनेशियाला ३-१ अशी विजयी आघाडी घेता आली.

अखेरच्या लढतीत श्रीकांतकडून निराशा

दोन देशांमधील अखेरच्या लढतीत किदांबी श्रीकांतकडून निराशा झाली. पहिला गेम त्याने २१-१९ असा जिंकला. दुसऱ्या गेममध्येही त्याने चिको वारडोयो या इंडोनेशियाच्या खेळाडूला झुंज दिली. पण दबावाखाली चिको याने आपला खेळ उंचावला व २४-२२ असा हा गेम जिंकत बरोबरी साधली. चिको याने अखेरच्या गेममध्ये यश मिळवत इंडोनेशियाला चौथा विजय मिळवून दिला.