पणजी : गोव्यात ऑक्टोबर - नोव्हेंबर दरम्यान होत असलेल्या ३७ व्या राष्ट्रीय स्पर्धांसाठी गोवा सज्ज झाले असून साधन सुविधा आणि इतर तयारीवर भारतीय ऑलिम्पिक असोसिएशन समाधानी असल्याचे मुख्यमंत्री डॉ. प्रमोद सावंत यांनी आज पणजीत स्पष्ट केले. यावेळी ऑलम्पिक असोसिएशनच्या अध्यक्षा पी टी उषा, क्रीडामंत्री गोविंद गावडे, असोसिएशनचे सचिव अमिताभ शर्मा, कल्याण चौबे उपस्थित होते.

मुख्यमंत्री सावंत म्हणाले ``राष्ट्रीय स्पर्धा ऑक्टोबर नोव्हेंबर दरम्यान गोव्यात होतील. स्पर्धेचे उद्घाटन २३,२४ किंवा २५ ऑक्टोबरला पंतप्रधान नरेंद्र मोदी यांच्या हस्ते होईल. याबाबतची अंतिम तारीख पंतप्रधान कार्यालयाकडून तारीख मिळाल्यानंतर जाहीर केले जाईल. या स्पर्धा प्रथमच गोव्यात होत असल्याने स्पर्धेचे उद्घाटन शानदार पद्धतीने मडगाव येथील फातोर्डा स्टेडियमवर होईल. या स्पर्धेसाठी गेल्या अनेक दिवसांपासून तयारी सुरू आहे. यावर ऑलम्पिक संघटना समाधानी आहे.``

राज्यातील खेळाचे वातावरण तयार करण्यासाठी या साधन सुविधांचा उपयोग होईल. गोवा हे आंतरराष्ट्रीय पर्यटन स्थळ असल्याने यापुढे इतर पर्यटनाप्रमाणे ''स्पोर्ट्स टुरिझम'' साठी याचा नक्कीच फायदा होईल. यासाठी गोमंतकियांनी सज्ज व्हावे, असेही मुख्यमंत्री म्हणाले.

यावेळी बोलताना असोसिएशनच्या अध्यक्षा पी टी उषा म्हणाल्या, गोव्यातील राष्ट्रीय स्पर्धेची तयारी उत्तम झालेली आहे.

स्पर्धा अत्यंत चांगल्या व खेळाडू वातावरणात नक्कीच यशस्वी होतील. असोसिएशनचे अमिताभ शर्मा म्हणाले गोव्यात फुटबॉल खेळाला विशेष स्थान असले. तरी इतर खेळ प्रकारांमध्येही गोवा पुढे जात आहे. राज्य सरकारने राष्ट्रीय स्पर्धेसाठी केलेली तयारी नक्कीच आश्वासक आहे. या तयारीवर असोसिएशन समाधानी आहे. स्पर्धेसाठी लागणाऱ्या तांत्रिक बाबींची स्वतंत्र समिती पाहणी करेल. मात्र आतापर्यंतची तयारी यशस्वी मानावी लागेल.

नेमबाजी, गोल्फ आणि ट्राय सायकलिंग महाराष्ट्रात

३७ व्या राष्ट्रीय स्पर्धेचे यजमानपद गोवा गोव्याकडे असले तरी स्पर्धेतील नेमबाजी, गोल्फ आणि ट्राय सायकलिंग हे तीन क्रीडा प्रकार सुविधांच्या अभावी महाराष्ट्रात होतील. याबाबत अंतिम निर्णय लवकरच जाहीर करण्यात येईल अशी माहिती क्रीडामंत्री गोविंद गावडे यांनी दिली आहे.