ऑकलंड : 19 जानेवारीला निर्णायक एक दिवसीय सामन्यात बलाढ्य ऑस्ट्रेलियन संघाला धूळ चारून मालिका जिंकणार्‍या भारतीय संघाने लगेच दुसर्‍या दिवशी बॅगा भरून न्युझीलंडला प्रयाण केले. संघातील बहुतांशी खेळाडू सिंगापूर एयरलाईन्सच्या विमानाने 21 तारखेला मध्यरात्री ऑकलंडला पोहोचले. विमानतळावरील औपचारिकता पूर्ण करून भारतीय संघातील खेळाडू साधारणपणे पहाटे 1 वाजता बाहेर आले तेव्हा 100 भारतीय चाहत्यांनी त्यांचे स्वागत केले.

होय मध्यरात्र उलटून गेल्यावरही भारतीय संघाचे चाहते ऑकलंड विमानतळावर हजर झालेले बघून खेळाडूंच्या चेहर्‍यावर हास्य पसरले. विराट कोहलीने चाहत्यांना, ‘रात हो गयी...सोये नहीं आप लोग’, असे प्रेमाने विचारले ज्याला चाहत्यांनी, ‘‘न्युझीलंडमें आपका स्वागत करने आये है’’, असे सांगितले.

बुधवारी भारतीय संघातील खेळाडूंनी मैदानावर न जाणे पसंत केले. संध्याकाळी सगळे खेळाडू हॉटेलातील व्यायामशाळेत जाऊन व्यायाम करून घाम गाळून आले. यजमान न्युझीलंड संघाने ईडन पार्क बाहेरच्या सराव मैदानावर जोरदार सराव केला ज्याला बहुतांशी खेळाडू हजर झालेले दिसले. भारतीय संघाचा सध्याचा फॉर्म बघता किती मोठे आव्हान आपल्या समोर आहे याची केन विल्यमसनला कल्पना आहे.

प्रशिक्षक रवी शास्त्रीने भारतीय संघ खूपच चांगल्या मनोअवस्थेत असल्याचे सांगितले. ‘‘पहिला सामना मोठ्या फरकाने गमावल्यावर एकाही भारतीय खेळाडूने कच खाल्ली नाही की आत्मविश्वास गमावला नाही. सगळ्यांनी बसून विचार केला आणि बेधडक खेळ करायचा मनोदय पक्का केला. दुसर्‍या सामन्यात विजय मिळवून 1-1 बरोबरी साधल्यावर बेंगलोरला ज्या प्रकारे आपण चांगल्या धावसंख्येचा दमदार फलंदाजी करून पाठलाग केला ते बघता मालिकेतील विजय अजून गोड झाला. महत्त्वाची बाब म्हणजे पूर्ण ताकदीच्या ऑस्ट्रेलियन संघाला आपण हरवले त्याचे समाधान मोठे आहे’’, रवी शास्त्री नेहमीच्या शैलीत सांगून गेला.    

शुक्रवारी पहिला टी20 सामना भारत न्युझीलंड दरम्यान होणार असल्याने भारतीय संघ गुरुवारी ईडन पार्क मैदानावर सरावाला जाणार असल्याचे संघ व्यवस्थापनाने सांगितले.