नवी दिल्ली : मागील वर्षी घेण्यात आलेली भारतीय कुस्ती संघटनेची निवडणूक ही बेकायशीर असल्याचा आरोप भारतातील कुस्तीपटूंनी केला असून या प्रकरणात याचिकाही दाखल करण्यात आली आहे. या याचिकेवर सोमवारी सुनावणी घेण्यात आली. त्यावर दिल्ली उच्च न्यायालयाने केंद्र सरकार, भारतीय कुस्ती संघटनेला कुस्तीपटूंच्या आरोपांना उत्तर देण्याचा आदेश दिला आहे. पुढील सुनावणी येत्या ७ मार्चला होणार आहे.

बजरंग पुनिया, साक्षी मलिक, विनेश फोगाट व सत्यवर्त कडियन या कुस्तीपटूंनी भारतीय कुस्ती संघटनेची निवडणूक बेकायदा असल्याचा आरोप करीत नवी दिल्ली उच्च न्यायालयात याचिका दाखल केली. न्यायाधीश सचिन दत्ता यांच्या खंडपीठाने केंद्र सरकार, भारतीय कुस्ती संघटना व ॲड हॉक समिती यांना याचिकेवर नोटीस पाठवली आहे.

व्यावसायिक कुस्तीपासून दूरच-साक्षी मलिक

ऑलिंपिकमध्ये ब्राँझपदक पटकावत भारताचे नाव उज्ज्वल करणारी साक्षी मलिक हिने कुस्ती क्षेत्राला अलविदा केला. ब्रिजभूषण शरण सिंह यांच्याविरोधात काही कुस्तीपटूंनी लैंगिक शोषणाचा आरोप केल्यानंतर जंतरमंतर येथे आंदोलनही करण्यात आले. मात्र, ब्रिजभूषण यांचे निकटवर्तीय संजय सिंह यांची भारतीय कुस्ती संघटनेच्या अध्यक्षपदी वर्णी लागली. साक्षी मलिक हिने या सर्व प्रकरणाला कंटाळून कुस्तीला रामराम केला. कुस्तीमध्ये पुनरागमन करण्यासाठी तिला चोहोबाजूंनी विचारणा करण्यात येत आहे. मात्र, तिने व्यावसायिक कुस्तीपासून दूरच राहणार असे स्पष्ट केले.

कुस्तीपटूंचे महत्त्वाचे मुद्दे

• क्रीडा संहितेचे उल्लंघन करून भारतीय कुस्ती संघटनेची निवडणूक घेण्यात आली.

• आशियाई अजिंक्यपद, आशियाई ऑलिंपिक पात्रता फेरीचे आयोजन बेकायदा आयोजन करण्यात आले.

• आमच्यासह आणखी कुस्तीपटूंचाही मानसिक व लैंगिक छळ करण्यात आला.

• ॲड हॉकी समितीनेच भारतीय कुस्ती संघटनेचा कारभार सांभाळावा.

• सर्वोच्च न्यायालयाच्या निवृत्त न्यायाधीशाकडे संघटनेची जबाबदारी सोपवल्यासही आनंद होईल.