Australia Vs West Indies Shamar Joseph : ऑस्ट्रेलियाचा बालेकिल्ला म्हणून ओळख असलेल्या गाबामध्ये कांगारूंनी पुन्हा एकदा पराभव पहावा लागला आहे. भारताने गाबा जिंकल्यानंतर आता वेस्ट इंडीजने देखील ऑस्ट्रेलियाच्या बालेकिल्ल्याला भगदाड पाडलं. वेस्ट इंडीजने रोमहर्षक सामन्यात 8 धावांनी विजय मिळवला. गाबा कसोटी जिंकत वेस्ट इंडीजने ऑस्ट्रेलियासोबतची मालिका 1 - 1 अशी बरोबरीत सोडवली.

वेस्ट इंडीजकडून वेगवान गोलंदाज शामर जोसेफने दुसऱ्या डावात 7 विकेट्स घेतल्या. विशेष म्हणजे 24 वर्षाचा हा गोलंदाज आपली दुसरीच कसोटी खेळत होता. जोसेफला सामनावीर आणि मालिाकवीराचा देखील पुरस्कार देण्यात आला. दुसऱ्या सामन्यात त्याचा पायाचा अंगठा दुखावला होता. फलंदाजी करताना त्याला मैदान देखील सोडावे लागले होते. मात्र तो गोलंदाजी करण्यासाठी मैदानात उतरला अन् त्यानं विंडीजच्या ऐतिहासिक विजयात मोलाचा वाटा उचलला. (West Indies Defeat Australia In Gabba Won Test After 27 Years)

सामन्याबद्दल बोलायचं झालं तर दिवस रात्र कसोटी सामन्यात प्रथम फलंदाजी करणाऱ्या वेस्ट इंडीजने 311 धावा केल्या होत्या. यात जोशुआ दे सिल्वाने सर्वाधिक 79 तर कावम हॉजने 71 धावा केल्या.

त्यानंतर वेस्ट इंडीजने ऑस्ट्रेलियाचा पहिला डाव 289 धावात संपवला होता. विंडीजने पहिल्या डावात 20 धावांची निसटती आघाडी घेतली. यावेळी विंडीजकडून अल्झारी जोसेफने 4 तर रोचने 3 विकेट्स घेतल्या. ऑस्ट्रेलियाकडून अॅलेक्स कॅरीने 65 तर कर्णधार पॅट कमिन्सने 64 धावांची खेळी करत डाव सावरला होता.

दुसऱ्या डावात वेस्ट इंडीज 193 धावाच करता आल्या होत्या. हेजलवूड आणि लॉयनने 3 विकेट्स घेत चांगला मारा केला. तर वेस्ट इंडीजकडून किर्क मॅकेन्झीने सर्वाधिक 41 धावा केल्या.

विजयासाठी 213 धावांचे आव्हान घेऊन मैदानात उतरलेल्या ऑस्ट्रेलियाचा डाव 207 धावात आटोपला. वेस्ट इंडीजकडून शामर जोसेफने दुखापत झाली असताना भेदक मारा करत 7 विकेट्स घेतल्या. तर ऑस्ट्रेलियाकडून स्टीव्ह स्मिथने एकाकी झुंज देज नाबाद 91 धावा केल्या तर कॅमरून ग्रीनने 42 धावांची खेळी करत त्याला साथ देण्याचा प्रयत्न केला.

मात्र विजयासाठी अवघ्या 8 धावांची गरज असताना शामर जोसेफने हजलवूडला शुन्यावर बाद करत वेस्ट इंडीजच्या ऐतिहासिक विजयावर शिक्कामोर्तब केलं.

(Sports Latest News)