नवी दिल्ली - अलाहाबाद सर्वोच्च न्यायालयाच्या हस्तक्षेपामुळे भारतीय ऑलिंपिक संघटनेने आशियाई क्रीडा स्पर्धेसाठी पुरुष हॅंडबॉल संघाची प्रवेशिका पाठवण्याचा निर्णय घेतला आहे. मात्र, आशियाई क्रीडा स्पर्धा संयोजकांनी संघाची प्रवेशिका अद्याप स्वीकारलेली नाही.

अलाहाबाद उच्च न्यायालयाच्या लखनौ खंडपीठाने हॅंडबॉल संघास आशियाई क्रीडा स्पर्धेस पाठवण्याचा निर्णय दिला आहे. "न्यायालयाच्या निर्णयाचा भारतीय ऑलिंपिक संघटनेच्या कायदे समितीने अभ्यास केला. त्यांनीही संघ पाठवण्यास मंजुरी दिल्याचे सांगितले. त्यानुसार आम्ही हॅंडबॉल संघाची प्रवेशिका पाठवली आहे,' असे भारतीय ऑलिंपिक संघटनेचे सचिव राजीव मेहता यांनी सांगितले. भारतीय ऑलिंपिक संघटनेने या महिन्याच्या सुरवातीस जाहीर केलेल्या संघात महिला हॅंडबॉल संघास मंजुरी देताना पुरुष संघाचा समावेश केला नव्हता; मात्र या स्पर्धेच्या ड्रॉमध्ये भारताचा समावेश करण्यात आला.

आशियाई हॅंडबॉल महासंघाने याबाबतची माहिती भारतास कळवली. त्यानंतरही भारतीय ऑलिंपिक संघटनेने मंजुरी न दिल्याने हॅंडबॉल संघटनेने न्यायालयात याचिका सादर केली होती.