आयपीएलच्या 15 व्या हंगामात पंजाब किंग्जचा कर्णधार कोण? होणार याची चर्चा गेल्या काही दिवसांपासून रंगत होती. लोकेश राहुलनं संघाची साथ सोडल्यानंतर त्याच्या जागेवर अनुभवी शिखर धवन दिसेल, असा अंदाजही वर्तवण्यात आला. पण पंजाबने आयपीएल मेगा लिलावाआधी रिटेन केलेल्या मयांकला सेनापतीचा मुकूट दिला आहे. 12 कोटी मोजून पंजाब किंग्जने मयांकला संघात कायम ठेवण्याचा निर्णय घेतला होता. आयपीएलमध्ये लोकेश राहुलच्या अनुपस्थितीत त्याने याआधीही पंजाब किंग्जे नेतृत्व केले आहे. आता तो पूर्णवेळ कर्णधार म्हणून त्याची निवड करण्यात आली आहे. (IPL 2022 Mayank Agarwal Named Punjab Kings Captai)

मयांक अग्रवालने केएल राहुल दुखापतग्रस्त झाल्यानंतर संघाचे नेतृत्व केले होते. गेल्या दोन हंगामात अग्रवालने 400 पेक्षा जास्त धावा केल्या आहेत. त्याने 2011 ला आयपीएलमध्ये पदार्पण केले होते. आतापर्यंत त्याने जवळपास 100 सामने खेळले आहेत. 31 वर्षाच्या या सलामीवीराने भारताकडून 19 कसोटी आणि 5 वनडे सामने देखील खेळले आहेत. पंजाबचा संघ आयपीएल विजेतेपदाचा दुष्काळ संपवण्याच्या इराद्याने मैदानात उतरेल. 2014 मध्ये संघ फायनलपर्यंत पोहचला होता. यावेळी ते ट्रॉफी उंचावण्यासाठी प्रयत्नशील असतील. मेगा लिलावामध्ये पंजाबने तगड्या खेळाडूंवर डाव लावत मजबूत संघ बांधणी केली आहे. मयांकच्या नेतृत्वाखाली संघ कशी कामगिरी करणार हे पाहणे महत्त्वाचे ठरेल.