IPL 2023 MS Dhoni Retirement : भारताचा माजी कर्णधार महेंद्रसिंह धोनी बाबत एक मोठी अपडेट आली आहे. आयपीएल 2023 चा हंगाम हा महेंद्रसिंह धोनीचा शेवटचा हंगाम असणार आहे. महेंद्रसिंह धोनीने याबाबत चेन्नई सुपर किंग्जच्या अधिकाऱ्यांनी अधिकृतरित्या काही सांगितलेले नाही.

मात्र CSK संघ व्यवस्थापनाला याची कल्पना आहे की धोनी आयपीएलची आपली शेवटची मॅच ही चेपॉकच्या प्रेक्षकांसमोर खेळेल. संघ व्यवस्थापनाला धोनी आयपीएलचा हंगाम सुरू होण्यापूर्वी अधिकृतरित्या याबाबत माहिती देईल अशी आशा आहे.

याबाबत बोलताना चेन्नई सुपर किंग्जचे अधिकारी म्हणाले की, 'आम्हाला वाटतंय की धोनीचा हा शेवटचा आयपीएल हंगाम आहे. धोनी आपली आयपीएल कारकीर्द ही आपल्या फेव्हरेट स्टेडियमवर संपवण्याची शक्यता आहे. याबाबत आपल्याला आयपीएल हंगाम सुरू झाल्यावर कल्पना येईल.'

धोनीने आयपीएल 2022 च्या हंगामात रविंद्र जडेजाकडे चेन्नईचे कर्णधापद सोपवून एकप्रकारे संकेत दिलेच होते. मात्र जडेजाच्या नेतृत्वात चेन्नई सुपर किंग्जची कामगिरी खालावली त्यामुळे अर्ध्यातून धोनीने पुन्हा संघाची धुरा आपल्या खांद्यावर घेतली होती.

मात्र यंदाच्या हंगामात धोनीचे उत्तराधिकारी होण्याची क्षमता असलेले दोन खेळाडू संघात आले आहेत. बेन स्टोक्स आणि अजिंक्य रहाणे दोघेही सीएसकेचे नेतृत्व करू शकतात. त्यामुळे धोनी त्याची कारकिर्द बिंधास्तपणे संपवू शकतो.

याबाबत सीएसकेचा अधिकारी म्हणतो की, 'महेंद्रसिंह धोनीने त्याच्या निर्णयाबाबत अजून आम्हाला काही कळवलेले नाही. तसेही त्याच्यावर निर्णय घेण्यासाठी कोणताही दबाव नाही. तो आमचा लिडर आहे त्यामुळे तो संघासाठी काय योग्य आहे हे पाहूनच निर्णय घेईल. संघ व्यवस्थापनाविषयी बोलायचं झालं तर या हंगामानंतरही तो खेळू इच्छित असेल तर आमचा त्याला पूर्ण पाठिंबा आहे.'

(Sports Latest News)