Team India : वर्ल्ड टेस्ट चॅम्पियनशिप 2023चा अंतिम सामना भारत आणि ऑस्ट्रेलिया यांच्यात 7 जून ते 11 जून दरम्यान इंग्लंडमधील ओव्हल मैदानावर खेळल्या जाणार आहे. या सामन्यानंतर भारतीय क्रिकेटमध्ये मोठा बदल पाहायला मिळणार आहे. टीम इंडियाला WTC फायनलनंतर अफगाणिस्तानविरुद्ध तीन सामन्यांची वनडे मालिका खेळायची आहे. या मालिकेपूर्वी बीसीसीआय मोठी घोषणा करू शकते.

फेब्रुवारी महिन्यात स्टिंग ऑपरेशननंतर चेतन शर्माला बीसीसीआयच्या मुख्य निवडकर्ताच्या पदावरून हकलपट्टी केली. स्टिंग ऑपरेशनमध्ये विराट कोहली, रोहित शर्मा, सौरव गांगुली आणि फिटनेससाठी इंजेक्शनसह अनेक खळबळजनक खुलासे केले होते. तेव्हापासून हे पद रिक्त आहे. पीटीआयने दिलेल्या वृत्तानुसार, अफगाणिस्तानविरुद्धच्या तीन सामन्यांच्या वनडे मालिकेपूर्वी बीसीसीआय मुख्य निवडकर्त्याची नियुक्ती करू शकते.

माजी भारतीय क्रिकेटपटू चेतन शर्माला मागील वर्षी नोव्हेंबरमध्ये ऑस्ट्रेलियात खेळल्या गेलेल्या टी-20 विश्वचषक 2022 मध्ये खराब कामगिरीमुळे वगळण्यात आले होते. मात्र नंतर त्याला कायम ठेवण्यात आले. चेतन शर्मा मुख्य निवडकर्ता असताना टीम इंडियाची कामगिरीही अत्यंत खराब होती. चेतन शर्मा यांच्या कार्यकाळात टीम इंडियाला एकही आयसीसी ट्रॉफी जिंकता आली नाही.

टीम इंडियाने सलग दुसऱ्यांदा आयसीसी वर्ल्ड टेस्ट चॅम्पियनशिपच्या अंतिम फेरीत धडक मारली आहे. पण गेल्या वेळी फायनलमध्ये टीम इंडियाला न्यूझीलंडकडून पराभवाला सामोरे जावे लागले होते. अशा परिस्थितीत यावेळी टीम इंडियाला कोणत्याही परिस्थितीत हे जेतेपद आपल्या नावावर करायचे आहे. टीम इंडियाने 2013 पासून एकही ICC ट्रॉफी जिंकलेली नाही, त्यामुळे टीम इंडियासाठी ही फायनल खूप खास असणार आहे.