Glenn Maxwell IPL 2024: आयपीएल 2024 चा एलिमिनेटर सामना बुधवारी राजस्थान रॉयल्स आणि रॉयल चॅलेंजर्स बंगळुरू यांच्यात खेळला गेला. या सामन्यात राजस्थानने आरसीबीचा चार गडी राखून पराभव केला. यासह बेंगळुरूचा आयपीएलमधील प्रवास संपला तर राजस्थान क्वालिफायर-2 मध्ये पोहोचला.

दरम्यान, या सामन्यात आरसीबीला ग्लेन मॅक्सवेलकडून मोठ्या खेळीची अपेक्षा होती, पण या सामन्यातही त्याची बॅट शांत राहिली. हा आयपीएल हंगाम मॅक्सवेलसाठी दुःस्वप्नापेक्षा कमी नाही. राजस्थान रॉयल्सविरुद्धच्या एलिमिनेटर सामन्यात मॅक्सवेल गोल्डन डकवर बाद झाला.

ग्लेन मॅक्सवेल हा एक स्फोटक फलंदाज म्हणून ओळखला जातो, पण आयपीएल 2024 मध्ये त्याची बॅट एकदम शांत राहिली. या हंगामात त्याने 10 डावात 43 चेंडूंचा सामना करत फक्त आणि फक्त 52 धावा केल्या. या हंगामात मॅक्सवेलचा स्ट्राइक 120 आहे आणि सरासरी 5.8 राहिली. आणि या हंगमाता मॅक्सवेल 4 वेळा खाते न उघडता पॅव्हेलियनमध्ये परतला. मॅक्सवेलला आरसीबीने 11 कोटी रुपयांना खरेदी करून संघाचा भाग बनवला होता. अशा परिस्थितीत, या हंगामात त्याच्या एका धावेची किंमत पाहिली तर ती 2,115,385 रुपये आहे.

ग्लेन मॅक्सवेल आता आयपीएलच्या एकाच हंगामात सर्वाधिक डकवर आऊट होणारा संयुक्त दुसरा खेळाडू ठरला आहे. या बाबतीत जोस बटलर आघाडीवर आहे. 2023 च्या आयपीएल हंगामात राजस्थान रॉयल्स संघाकडून खेळताना तो 5 वेळा डक आउट झाला. या यादीत संयुक्तपणे 8 खेळाडू दुसऱ्या क्रमांकावर आहेत.