Hardik Pandya Injured IPL 2023 : आयपीएल 2023 च्या गुणतालिकेत सध्या 16 गुण घेत अव्वल स्थानावर असलेल्या गुजरातला मुंबईविरूद्धच्या सामन्यात 27 धावांनी पराभव स्विकारावा लागला. मुंबईने सामना जिंकला असला तरी गुजराजच्या पहिल्या स्थानाला कोणताच धक्का पोहचला नव्हता. मात्र या सामन्यात गुजरातच्या चाहत्यांसाठी एक चिंता वाढवणारी गोष्ट घडली. गुजरातचा कर्णधार हार्दिक पांड्याने मुंबईविरूद्ध एकही षटक गोलंदाजी केली नाही. मोहम्मद शमीसोबत मोहित शर्माने नवीन चेंडू टाकल्याने चाहत्यांना आश्चर्याचा धक्का बसला.

हार्दिक पांड्याने मुंबईविरूद्धच्या सामन्यात एकही षटक गोलंदाजी न करण्याचा निर्णय हा रणनितीनुसार घेण्यात आला होता की यामागे काहीतरी गंभीर कारण होतं अशी चर्चा सुरू झाली. आता या चर्चेला गुजरात टायटन्सच्या सहाय्यक कोच आशिष कपूरने उत्तर दिले आहे. त्यांनी सांगितले की मुंबईविरूद्धच्या सामन्यापूर्वी हार्दिक पांड्याच्या पाठीचा स्नायू ताणला गेला होता.

गुजरातने मुंबईविरूद्ध पाच गोलंदाजांचा वापर केला. मोहम्मद शमी आणि मोहित शर्मा यांनी नवीन चेंडू टाकला तर मधल्या षटकात राशिद खान आणि नूर अहदमने गोलंदाजी करण्याची जबाबदारी पार पाडली. त्यानंतर अल्झारी जोसेफने स्लॉग ओव्हरमध्ये गोलंदाजी केली.

गुजरातचे सहाय्यक कोच आशिष कपूर यांनी सांगितले की सामन्यापूर्वी हार्दिक पांड्याच्या पाठीचा स्नायू ताणला गेला. त्यामुळे त्याने धोका न पत्करता गोलंदाजी न करण्याचा निर्णय घेतला. हार्दिक पांड्याला पाठीत थोडा स्टिफनेस जाणवत होता. गुजरातच्या दृष्टीने हार्दिक पांड्याचा फिटनेस हा अत्यंत महत्वाचा विषय आहे. त्यामुळे यावर त्वरित निर्णय घेऊन हार्दिकला गोलंदाजी करण्यापासून रोखण्यात आले. जरी तो दुखापतग्रस्त असला तरी त्याने फिल्डवर जाऊन क्षेत्ररक्षण केले.

(Sports Latest News)