Harshit Rana - Shah Rukh Khan: इंडियन प्रीमियर लीग 2024 स्पर्धेचा अंतिम सामना रविवारी चेन्नईमध्ये कोलकाता नाईट रायडर्स आणि सनरायझर्स हैदराबाद संघात पार पडला. या सामन्यात कोलकाताने 8 विकेट्सने विजय मिळवत तिसऱ्यांदा आयपीए ट्रॉफी नावावर केली.

कोलकाता संघाने या विजयानंतर फ्लाईंग किस करत सेलीब्रेशन केले होते. यामागील कल्पना सहसंघमालक शाहरुख खानची होती. याबाबत कोलकाताचा वेगवान गोलंदाज हर्षित राणाने खुलासा केला आहे. हर्षितनेही कोलकाताच्या विजयात मोलाचा वाटा उचलला आहे. त्याने 13 सामन्यांत 19 विकेट्स घेतल्या.

दरम्यान, हर्षितच्या या हंगामातील कामगिरीबरोबर तो काही वादग्रस्त गोष्टींमुळेही चर्चेत राहिला. हर्षितवर बीसीसीआयने सनरायझर्स हैदराबादविरुद्धच्या साखळी सामन्यात मयंक अग्रवालला आणि दिल्ली कॅपिटल्स विरूद्धच्या साखळी सामन्यात दिलेल्या सेंड ऑफमुळे कारवाईही केली होती.

त्याने मयंक अग्रवालला फ्लाईंग किस देत सेंड-ऑफ दिला होता. दरम्यान, त्याला दिल्ली विरूद्धच्या सामन्यानंतर एका सामन्याची बंदी घालण्यात आलेली.

दरम्यान, या बंदीनंतर 22 वर्षीय हर्षितला शाहरुख खानने धीर दिला होता. याबाबत इंडियन एक्सप्रेसशी बोलताना हर्षितने खुलासा केला आहे. तसेच त्याने शाहरुखने दिलेल्या शब्दाबाबतही सांगितले.

हर्षितने सांगितले की 'माझ्यावर जेव्हा एका सामन्याची बंदी लागली होती, तेव्हा मी निराश झालो होतो. त्यानंतर शाहरुख खान सर माझ्याकडे आले आणि ते मला म्हणाले, तू टेन्शन नको घेऊ, हे सेलीब्रेशन आपण ट्रॉफीसह करू.' त्याने मला शब्द दिला आणि त्याने ट्रॉफीसह आणि संघासह तसं करत शब्द पूर्णही केला.'

दरम्यान, हर्षित यंदाच्या हंगामात चांगली कामगिरी करणाऱ्या युवा खेळाडूंपैकी एक आहे. त्याच्या गोलंदाजीचे कौतुक कोलकाताचा आणि ऑस्ट्रेलियाचा स्टार वेगवान गोलंदाज मिचेल स्टार्कनेही केले होते.