IPL 2021 CSK vs KKR: महेंद्रसिंग धोनीच्या CSK संघाविरूद्ध कोलकाता नाईट रायडर्सने नाणेफेक जिंकली आणि प्रथम फलंदाजीचा निर्णय घेतला. कोलकाता संघाचा सलामीवीर शुबमन गिल याला एकदा जीवदान मिळाले पण पुढच्याच चेंडूवर तो धावबाद झाला. त्यानंतर फॉ्र्मात असलेला व्यंकटेश अय्यरही स्वस्तात बाद झाला. कोलकाताचा कर्णधार इयॉन मॉर्गन याने धावगती वाढवण्याचा प्रयत्न केला, पण फाफ डू प्लेसिसना अफलातून झेल घेत त्याला माघारी धाडला.

कोलकाता संघाची धावसंख्या ९ षटकात २ बाद ७० इतकी झाली होती. कर्णधार मॉर्गन मैदानात होता. धोनीने आपल्या संघाचा सर्वोत्तम गोलंदाज जोश हेजलवूडला गोलंदाजीसाठी आणला. त्याला पहिल्याच चेंडूवर फटका मारायचा आणि त्याची गोलंदाजीची लाईन बिघडवायची असा त्याचा प्लॅन होता. पण, त्याने मारलेल्या फटक्यावर फाफ डू प्लेसिसने भन्नाट झेल टिपला. सीमारेषेवर चेंडू हवेत दिसताच डू प्लेसिसने झेप घेतली आणि भन्नाट कॅच घेतला.

दरम्यान, मॉर्गन बाद झाल्यावर पाठोपाठ राहुल त्रिपाठी ४५ धावांवर बाद झाला. आंद्रे रसलदेखील स्वस्तात बाद झाला. त्यामुळे धावसंख्या फारशी होणार नाही असा चाहत्यांचा अंदाज होता. पण दिनेश कार्तिकने ११ चेंडूत ३ चौकार आणि एका षटकारासह २६ धावा केल्या. कार्तिक आणि नितिश राणाच्या ३७ धावांच्या जोरावर कोलकाताने १७१ धावांपर्यंत मजल मारली.