IPL 2021 MI vs CSK: युएईमध्ये रंगलेल्या IPLच्या दुसऱ्या टप्प्यात चेन्नईच्या संघाने विजयी सलामी दिली. चेन्नईने मुंबई संघावर २० धावांनी विजय मिळवला. ऋतुराज गायकवाडच्या नाबाद ८८ धावांच्या जोरावर चेन्नईने १५६ धावा केल्या. या आव्हानाचा पाठलाग करताना पोलार्डच्या नेतृत्वाखाली मुंबईच्या संघाला २० षटकात केवळ १३६ धावाच करता आल्या. त्यामुळे मुंबईला पराभवाचे तोंड पाहावे लागले. पण सामन्यात कायरन पोलार्डने रविंद्र जाडेजाला लगावलेला उत्तुंग षटकार विशेष चर्चेचा विषय ठरला.

मुंबईला दिलेल्या १५७ धावांच्या आव्हानाचा पाठलाग करताना त्यांची सुरूवात खराब झाली. क्विंटन डी कॉक, अनमोलप्रीत सिंग, इशान किशन आणि सूर्यकुमार यादव हे चौघे स्वस्तात बाद झाले. त्यानंतर कर्णधार कायरन पोलार्ड खेळायला आला. रविंद्र जाडेजाने त्याला पायाजवळ टप्पा टाकला आणि त्याने अतिशय उत्तुंग असा षटकार लगावला. चेंडू पायाजवळून वळेल अशी जाडेजाची अपेक्षा होती, पण पोलार्ड जाडेजावर भारी पडला.

पाहा व्हिडीओ-

पोलार्डने एकमेव मोठा फटका खेळला. त्यानंतर पोलार्ड पायचीत झाला. सौरभ तिवारीने एक बाजू पूर्णवेळ लावून धरली होती. पण त्याला मोक्याच्या क्षणी धावगती वाढवणं शक्य झालं नाही. त्याने ५ चौकारांसह ४० चेंडूत ५० धावा केल्या. बाकी कोणत्याही फलंदाजाला मोठी खेळी करता आली नाही. ब्राव्होने ४ षटकात २५ धावा काढल्या आणि ३ गडी बाद केले. ५८ चेंडूत नाबाद ८८ धावा करणारा ऋतुराज गायकवाड सामनावीर ठरला.