IPL 2022 : मुंबईतील ब्रेबॉर्न स्टेडियमवर दिल्ली कॅपिटल्स (DC) आणि कोलकाता नाईट रायडर्स (KKR) यांच्यात रंगलेला सामना एकतर्फी झाला. दिल्ली कॅपिटल्सने 200 पार धावा करुन कोलकातासमोर आधी डोंगराऐवढे लक्ष्य ठेवले. त्यानंतर दिल्लीच्या गोलंदाजांनी कोलताच्या फलंदाजीला सुरुंग लावला. दिल्लीने 44 धावांनी सामना जिंकत स्पर्धेतील दुसरा विजय नोंदवला. दिल्लीच्या दिमाखदार विजयाला वादाचे ग्रहण लागले आहे. दिल्ली कॅपिटल्सचा मुख्य प्रशिक्षक रिकी पाँटिंग (Ricky Ponting) याचा एक व्हिडिओ सोशल मीडियावर व्हायरल होत आहे. या व्हिडिओत तो अंपायरशी हुज्जत घालताना दिसतोय. (IPL 2022 DC vs KKR Ricky Ponting Angry On Umpire)

रिकी पाँटिंग आक्रमक अंदाजात अंपायरसोबत वाद घालताना दिसते. दिल्ली कॅपिटल्सच्या डावातील 19 व्या षटकात हा सर्व प्रकार घडला. पाँटिंग अंपायरसोबत वाद घालताना दिसले. या सामन्यात मैदानातील अंपायरकडून अनेक चुकीचे निर्णय देण्यात आले. मात्र रिव्ह्यूच्या माध्यमातून फलंदाजांनी आपली विकेट वाचवण्यात यश मिळले. कोलकाताचा संघ धावांचा पाठलाग करत असताना अजिंक्य रहाणेला दोनवेळा अंपायरने बाद दिले. पण रिव्ह्यच्या माध्यमातून त्याने विकेट वाचवली. पण याचा त्याला किंवा संघाला फार फायदा झाला नाही. तो अवघ्या आठ धावा करुन तंबूत परतला.

अंपायरसोबतच्या वादाआधीच पाँटिंग ट्विटरवर करत होता ट्रेंड

पाँटिंगने सरफराज खानच्या आधी शार्दुल ठाकूरला बढती दिल्याने तो ट्विटरवर ट्रेंडमध्ये आला होता. त्याचा हा निर्णय अनेकांना खटकला होता. पण शार्दुल ठाकूरनं त्याचा हा निर्णय सार्थ ठरवला. शार्दुलनं 11 चेंडूत तुफान फटकेबाजी करत 29 धावा कुटल्या.

रिषभ पंतच्या नेतृत्वाखालील दिल्ली कॅपिटल्सचा संघ चौथा सामना खेळण्यासाठी मैदानात उतरला होता. या सामन्यातील विजयासह त्यांच्या खात्यात आता दोन विजयाची नोंद झाली असून 4 गुणांसह ते गुणतालिकेत पाचव्या स्थानावर आहेत. दुसऱ्या बाजूला कोलकाता संघ यंदाच्या स्पर्धेत दमदार कामगिरी करताना दिसतोय. श्रेयस अय्यरच्या नेतृत्वाखालील कोलकाता संघाने 5 पैकी 3 सामन्यातील विजयासह पराभवानंतरही 6 गुण मिळवत अव्वलस्थान कायम राखले आहे.